[spirit_stallion]

السلام عليكم
اخوانى الاعزاء انا من زمان جدا و عاوز اربى قط و للاسف اهلى مش موافقين المهم لى صديق عنده قطط صغيرة و قرر انه يهدينى واحد و بصراحه انا ليا شويه اسئله قبل ماجيب القطه و بعدها اندم او اكتشف انى غلط
اولا لو عملت للقطه مكان معين تنام فيه عبارة عن باسكت او صندوق ممكن تلتزم بيه ولا حتنام فاى حته فالبيت
ثانيا بالنسبه للحمام بتاعها ان قررت انى استخدم لها صندوق فيه رمل و يتغير فهل بيعمل ريحه وحشه و خصوصا انى حاستخدم الرمل العادى المخصص لاعمال البناء بصراحه ماقدرش اتحمل تكاليف الرمل المخصوص لان عندى مجموعه كبيرة من الطيور و كل فلوسى رايحه عليهم
ثالثا القوة التدميريه للقطه بمعنى ممكن تدمر الاثاث و المفروشات ولا بتكون هاديه
رابعا هل ممكن تقعد لوحدها فالبيت لمده بسيطه اقصاها 6 ساعات
خامسا بالنسبه للاعتناء بالقطه الوقت الى بتحتاجه فتسريح شعرها الجروميجن يعنى و الجرومينج دا بيبقى كل كام يوم بصراحه انا ممكن اوفرلها ساعتين كل اسبوع للاعتناء بيها و نظافتها فهل كدا كفايا ولا لازم كل يوم انظفها
اخيرا القطه دى امها بلدى و ابوها شيرازى مون فيس بس مستوى عالى فشكلها ممكن يكون ايه لانها لسه صغيرة اسبوعين يعنى هل شعرها طويل ولا عادى زى البلدى و طبعها هادى ولا شقيه
و معلش سؤال خاص بالمصريين القطط الاكزوتيك الى شبه الشيرازى البيكى فيس بس شعرها قصير هل موجوده فمصر و تمن القط كام الصغير طبعا
معلش انا عارف انى طولت عليكم باسئلتى بس عاوز اتطمن قبل ماجيب القطه لانها حتبقى روح و متعلقه فرقبتى و مبحبش انى اقصر فرعايه اى حيوان عندى