[dr.manal]

انا هحكى التجربه علشان تستفيدوا منها ان شاء الله بصو يا جماعه المشكله بدات لما حسيت ان الكيتين بتاعتى عندها ديدان و سالت دكتور و قالى اديلها ايفيرميكتين المهم مقليش الجرعه فانا اديتها حبايه و تانى يوم حبايه و دا طبعا كتييييييييييييييييييييييييييير جدا لان هو بيتاخد حبايه لكل 15 كيلو و جرعه واحه بس المهم دخلت منى فى تسممو جالها زى شلل فى جسمها كلو و كمان حدقه عنيها وسعت و اسهال من الاخر كانت بتموت يعنى و مش بتاكل ولا بتشرب و لا قادره تتنفس حتى المهم رحت بيها على دكتور قالى الدوا ملوش جرعه مضاده و اداها فيتامين ه المهم القطه متحسنتش رحت طالعه بيها على دكتور تانى غير الاولانى ادالها حقه اتروبين و حقنه فيتامين كاف و حقنه جلوكوز و قالى لو عديت الاربع ايام دول و ممتتش هتبقى كويسه و تكمل عادى المهم طبعا نزلت من عنده منهاره من العياط و عقبال ما روحت لاقتها نايمه على جنبها و مبتتحركش نهائى المهم قومت واخداها على دكتور تالت قالى متقلقيش و هتبقى كويسه و اديها شويه ميه على عسل و افضلى اديها منها طول الليل و لو رجعت مش مشكله و اصبرى عليها لحد بكره لو لقتيها بترجع لسه اديلها نص امبول كورتيجين فى العضل المهم فضلت اديها على مدار 10 ساعات بالسرنجه عسل على ميه و طبعا رجعت مرتين و كل شويه اسهال قولت مش مشكله بتطرد السموم و فى الوقت ده كنت متابعه الحاله مع دكتور رابع على الفيس و قالى ان لازم تديها محلول جفاف علشان الاملاح الى بتفقدها فى الترجيع و الاسهال و محلول الجفاف للناس الى مش عارفاه بيتحل على 200 مم ميه اى ما يعادل ازازه بيبسى من الصغيره خالص دى المهم بيتاخد بالسرنجه و تدى سم كل دقيقه متدهوش بسرعه علشان ميرجعش و على فكره دى نفس الى بنعمله مع الاطفال الى عندهم اسهال المهم على الفجر كده بدات تتحسن الحمد لله و لاقتها بدات تقوم و تنون فى البيت فالدكتور الى على الفيس قالى تبقى جعانه روحت جبتلها زبادى و يا عينى كانت غطسانه فى طبق الربادى مش قادره تصلب طولها المهم اكلتها منه بردك و بعدين قامت شربت ميه كتيييير كانت عطشانه و بعد كده على الساعه 8 الصبح كده كانت تعبت اوى انا و هى بصراحه فنمنا احنا الاتنين و صحيت مخضوضه عليها الساعه 11 كده قومت فوقتها و اديتها معلقه عسل و نزلت بيها للدكتور الاولانى لان دا معانا فى نفس البيت و قالى هى هتبقى كويسه ان شاء الله سبيها تاكل بس و سبحان الله اول ما دخلت البيت دخلت على الاكل و استعادت شهيتها بس كان فى ضعف لسه فى العضلات و المهم نامت بعدها بتاع 4 او 5 سعات و قامت مستريحه الحمد لله و هى دلوقتى فات عليها 3 ايام و بتاكل الحمد لله كويس و بتلعب بس حدقه عنيها لسه واسعه و دا معناه ان لسه فى سموم فى جسمها و لسه الاسال شغال بس نسبه قلت و انا متابعه معاها بمحلول الجفاف
ادعولى بقى ربنا يتم شفاها على خير و مش عايزه حد يتريق و النبى و يقولى فى ناس مش لاقيه تاكل و كده انا عارفه كل ده و ربنا يلطف بينا كلنا بس دى روح و مسئوله مننا و انا كنت سبب من الاسباب الى دخلتها فى المشكله دى و هى لا حول لها ولا قوم
يا رب تكونوا استفدتوا زى ما انا استفدت من التجربه دى و انا عايزه اقول لاى حد يسمع حد يقولوا دى القطه هتموت او خلاص دى مش نافع تتعالج الاعمار بيد الله و انت اعمل الى عليك وراعيها بكل طاقتك و ان شاء الله قدره ربنا فوق كل حاجه دى تالت تجربه اكمر بيها و يقلولى القط هيموت و الحمد لله بيخف بمشيئه الله خلى عندك امل و ثقه فى قدره ربنا و هو مش هيخذلك ابدا