[الدلع]

وعليكم السلام ورحمة الله وبركاته
حياك الله
التطعيمات :
فيه ثلاث تطعيمات أساسية وبعدين يتكرر التطعيم سنوياً لتنشيط ذا التطعيمات .
ونصيحتي لك لا تهملها أبداً ولا تستهين فيها لأنها مفيدة لصحة البسس.... ومناعة الأم بإذن الله مناعة لبزورتها وقت الحمل وبعد الولادة
إذا رحت للبيطري وعطاهم أول تطعيمه بيكتب لك على دفتر التطعيم متى موعد التطعيمة الجاية فلا تشيل هم
إذا متأكد ان عمرهم شهرين فلهم أول تطعيمه في ذا السن....لكن الأفضل تأخره للشهر الثالث حتى يتحملون التعب الي بيصير لهم بعد التطعيم....لا تخاف ما راح يطوّل معهم .
لا تنسى جرعة الديدان ( حبوب فقط ) وانتبه من البيطري الي يعطي ( أبر ) لا تسمح له وان شفته كذا فر منه فرارك من الأسد لأن بعضهم ما يهتم غير بالفلوس ولا تهمه صحة البسة والتطعيم أغلى من الحبوب والتطعيم خطر فابتعد عنه تماماً .
أنا من المؤيدين وبشدة لعرض البسس على ( العيادات البيطرية المتخصصة ) فقط وليس العيادات البيطرية التابعة لمحلات الحيوانات والسبب وجود الخبرة الكافية والامكانيات الطبية والنظافة
بالنسبة لي جربتهم وارتحت معهم وصحة بناتي مهمة عندي وما راح أحطها إلا في أيدي أمينه بإذن الله وما في شي يغلى عليهم فديتهم
هذا المختصر ......وإذا كنت مصمم وتبي روابط عطيناك ابشر
التنظيف :
المفترض انهم يكونون في ذا السن متعودين على قضاء حاجتهم ( الله يكرمك ) في الرمل وكذلك دفنه لكن ممكن تكون مسألة تنظيف منطقة الإخراج لأنهم صغار ( لك عليها ) يعني إما تكون أمهم حريصة فتنظفهم أو انت تتسلّم ذا المهمة وتراقبهم بحيث لو التصق أي شي في الشعر المحيط بمنطقة الإخراج تكون مستعد وحاط قريب من صندوق الرمل علبة مناديل رطبة الخاصة بالأطفال وتنظفهم وأقترح عليك إذا كان شعرهم طويل انك تقصه وبحذر في ذا المنطقة حتى تقل مشكلة الالتصاقات المزعجة الي الكثير يشتكي منها
الترويش أجله الحين وخله بعدين واكتفي لما يتوسخ شعرهم انك تمرر المناديل الرطبة على شعرهم بعكس اتجاه الشعر أو تستعمل بودرة ( الدراي كلين ) حطه بهدوء على الشعر وبعدين مشطه وخلاص وحتى بيعطيهم ريحة حلوة
المخالب :
لازم تعودهم ما داموا صغار بعمر الثلاث شهور على قص مخالبهم بنفسك لأنهم لو كبروا وانت ما عودتهم ما راح يسمحون لك وبسهولة انك تقصها وبتصير معركة ( امسك ولا تمسك ) غير مشكلة خربشة الأثاث وهذي حدث ولا حرج
اشتغل على الأظافر كلها ولا تترك ولا واحد .
بعض النصائح :
البسس كائنات حيّة رائعة ولطيفة وروح
لما نجيبهم للبيت ويصيرون تحت عهدتنا فالله بيسألنا عنهم فلازم يكون اهتمامنا فيهم كاهتمامنا بنفسنا أو بواحد من أفراد العائلة لأنه لما يحل في البيت خلاص يصير من أهله نوفر له كل شي تتطلبه مسئولية رعايته ( أكل , شرب , رعاية صحية , رعاية نفسية بحيث نغدق عليه من الحب والحنان ونعطيه من وقتنا حتى ولو كنا مشغولين وخصوصاً لما يكون انتقل من عند أصحابه لناس آخرين يشوفهم أول مرة فيحس بالخوف والوحدة لحد ما نحسسه إنه جزء لا يتجزء من حياتنا وساعتها مثل ما نعطيه يعطينا
النصايح كثير ما تحصى في كل مجال وممكن تستفيد من القسم بهالخصوص بشكل كبير والمشرفات والأعضاء بمواضيعهم ومشاركاتهم القيمة ما قصروا الله يعطيهم العافية
لكن أبعطيك أشياء ممكن تغيب عن البعض :
البسس كائنات تكره الحبس وتحب الحرية فخلهم على راحتهم يتجولون في البيت مع الحرص على نظافتهم وعدم السماح لهم بالخروج للشارع حتى ما يتعرضون للأذى من الحيوانات الثانية الشرسة أو البزارين المزعجين أو تدعسهم السيارة
البسس ما تحب البزارين المزعجين فإذا كان عندكم من ذا النوعية حاول تبعدهم عنهم حتى يحسون بالطمأنينة والراحة النفسية
الحرص على غلق دورات المياه عنهم حتى ما يتعرضون للتلوث أو يصابون لا سمح الله بالتسمم نتيجة وجود المطهرات وأدوات التنظيف وإذا كان عندكم تنظيف للسيراميك أو السجاد ابعدهم عن هذي الأماكن لحد ما يتم تنظيفها بشكل كامل لأن البسس من عادتها لما يلصق في أطرافها أي شي تلحسه ولو مشت على مواد التنظيف ولحسته بيجيها تسمم
عدم الاستهانة بأي طارئ صحي للبس وخصوصاً إن كان سنه صغير لأنك قد تفقد من تحب بتأخير يوم واحد أو حتى عدة ساعات .
البسس ذكية وقابلة للتدريب وهذا السن مناسب لتدريبها على أي شي انت تحبه .
سرح شعرهم يومياً وخلهم يتعودون وهم في ذا السن ولا بعدين بتصير عركه وبيصيرون يعضون في الفرشة وما راح يسمحون لك وذا الشي يمنع تساقط الشعر في البيت مع العناية بصحتهم وبتنوع أكلهم وراحتهم النفسية حتى ما تواجهك هالمشكلة الي هي التساقط .
عودهم ياكلون كل شي مفيد ومسموح فيه لهم حتى بعدين ما يتعبونك إذا كبروا ويصيرون ما ياكلون إلا صنف واحد وخصوصاً لو كان دراي فود فقط وهذا مكمل غذائي ومو أكل أساسي والاكتفاء به ممكن يسبب سوء تغذية .
عرّض بسسك للشمس في الصباح مع بداية شروق الشمس لمدة ربع ساعة هذا في أيام العطلة أما في وقت الدراسة فخلها بعد العصر وقبل ما تغيب الشمس وفي كل الحالتين اجلس تشمّس معهم
الترويش وقص المخالب وتنظيف الإذنين سوها لهم بنفسك ولا تروح لمحلات حيوانات أبداً لأن المكان المخصص للتنظيف والعمالة فيها يفتقرون للنظافة وللمعاملة الطيبة للحيوانات ويكفيك لما تشوف الحالة المزرية للحيوانات داخل الأقفاص لدرجة ان بعض الحيوانات ميتة داخل القفص ولما تنبههم يقولون عادي هذي نايمة والحرمة فاطسة ونافقة .
وان اضطريت لذا الأمور فقدامك العيادات المتخصصة فقط عندهم كل ذا الخدمات زائد حلاقة الشعر لو حبيت..... أهم شي ما تعرّض بسسك للأمراض الي ممكن تنتقل لهم بسبب عدم حرص ذا العمالة على النظافة لأنهم يشركون عدد كبير من الحيوانات في نفس الفوطة ونفس المشط والفرشة وبالتالي تنتقل الفطريات وغيرها .
طولت السالفة وأتمنى أكون افدتك.....بس ان تذكرت شي رجعت >>>>> راعية طويلة
تحياتي لك