[||عشقي الامزون||]

يا هلا ومرحبتين

شف وانا اخوك على حسب شخصية الببغاء
يعني فية ببغاوات ما يحتاج لها مدة ,تلاقيها على طول تتكيف على الوضع وعلى المكان وعلى مربيها
وفية ببغاوات لا إذا تغير عليها المكان

لكن أخذها مني دامه على كلامك اليف بالمحل والكل يمسح علية
توكل على الله وجمد قلبك وحاول تتقرب منة بحركة بطيئة ولا تبين له انك خايف
صحيح بتاكل لك كم عضة منه في سبيل الوصول للي تبية لكن تحمل
والمثل يقول (الي يجي بالسهل يروح بالسهل)

وتراني زيك أذا شريت طير جديد أحاول بشتى الطرق اني امسح علية والعب معها لكن فيه ببغاوات كرهتني ام الطيور من عنادها
وفيه ببغاوات على طول يومين او ثلاثة او بالكثير اسبوع وتقدر بعدين تمسح عليها
واخر تجربة لي مع الامزوني كوكو الي اكلت منه عض الله لا يوريك بس بعدها وصلت للي ابيه
والحين تمسح على جسمه كله ما يقولك شي بالعكس يلعب معك

وانا ضد التجويع ابداً
ولا انصح فية لان الببغاء راح ياكل من يدك صحيح
بس موب حباً فيك بياكل عشان يسد جوعه
وفي هالحالة انت ما كسبت حب الببغاء بس كسبت انك اكلته بيدك



وانا بقولك كم نقطة انشالله تساعدك وتقدر تمسح عليه:

1- اذا حاول يعضك لا تسحب يدك بسرعة لانه بيعرف وقتها أن عضته جابت نتيجة.
2- يفضل انك تمسح علية بيدك بدون قفازات لان بعض الطيور تجيها جلطه اذا شافت القفازات تقوم تناقز يمين يسار.
3- الصبر وهو أهم شي يعني اذا عضك لا تصيح بوجهه لانك بتخوفه بهالطريقه حاول تتحمل وتتعامل معه بلطف.


وصدقني الببغاوات مخلوقات عجيبة وخصوصا اذا حبتك بتشوف كيف تتعامل معك
واذا بغيت شي تلاقينا في الخدمة

أخـــــوك / ||عشقي الامزون||