هلا فيك النور نورك حبيبي
إذا عمرهم 10 ايام وما بدو ياكلون معناها نوعهم سوري.. ولا انا غلطان؟
لأن الروسي عندي ياكلون من عمر 7 او 8
والسوري من 9 او 10
ترى احتمال هم ياكلون ومو شرط يتحركون من مكانهم.. ممكن الام تعبي جيوبها وتودي الاكل لهم
غير مكانهم وراقبهم
بالنسبة للمريضة اكيد الجرح اللي أثر عليها مو الحمل.. الحمل ما يتعبهم كثير إلا في اليومين الأخيرة قبل الولادة بس مايضعف صحتهم اللهم تعب عام وقلة نشاط
المرة لوحدها ماظن تكفي.. قطرة الفيتامين علاج ممتاز لأنه مقوي ومنشط عام والقطرة الوحدة فيها تركيز فيتامينات ومعادن يعادل الموجود في عدة وجبات.. وتعتبر ضرورية جداً للهامستر المريض والحامل والمرضعة
المرة تعطيها لأنها مضاد حيوي وبنفس الوقت مطهرة للجهاز الهضمي ولو فيه جروح داخلية او نزيف داخلي أو جنين ميت المرة رح تنظف وتفيد كثير
..
بالنسبة للذكر المتوحش المفترض ان الذكر ما يضرب الانثى إلا إذا أظهرت عنف معاه.. أو حس انها بتستولي ع أكله ومنطقته والاحتمال الثاني ذا نادر إلا إذا كان الأكل فعلا قليل
تأكد ان الانثى اللي دخلتها أنثى مو ذكر.. بعض الذكور الصغيرة في العمر أعضاءهم التناسلية تخدع فتشوف الفتحتين قريبة من بعض أكثر من الذكور الواضحة لأن عمره صغير والخصيتين لسه ما كبرت فتظنه أنثى.. أنا كان عندي ذكر ع بالي أنثى لين صار عمره 25 يوم ومادريت الا هذا يركب اخته ويحاول يلقحها ويوم رفعته إلا الفتحتين قريبة كأنه أنثى! وتوها الفتحتين بدأت تبتعد والخصيتين تكبر مع ان واحد من اخوانه ذكر لاحظت ان فتحاته بعيدة من يوم عمره 10 ايام!
عموما مشكلتك ذي واجهتني قبل كذا مع ذكر سوري.. جسمه قوي وطبعه عنيف الزبدة عربجي نمرة واستمارة وأي ذكر تحطه قدامه مليون في الميه رح ينجرح منه جرح خطير في غضون 5 ثواني! لكن مع الاناث يكون راغب في التزاوج بس لو رفضته انثى يتوحش عليها كأنها ذكر!
فيه حلين.. الأول انك تقص أسنانه ثم تحطهم مع بعض وانت مطمن بس ماتخليهم كثير.. بس ما انصحك فيه كبداية لأن قص الأسنان يحتاج تعلم ودقة وحذر.. إلا إذا انت مستعد تجرب خبرني واعلمك الطريقة
الحل الثاني وهو الأضمن.. انك تمسح اجسامهم بمرة مخففة.. أولا المرة مفيدة للجلد والفرو.. ثانيا بتطغى ريحتها ع اي ريحة ثانية موجودة في الانثى وما عجبت الذكر او العكس.. ثالثا وهو الأهم ان الريحة بتكون معلمة في الاثنين وهذا يقلل الشعور بالخطر والتهديد
اول شي لازم يكون المكان دافي.. خذ لك منديل وبلله بموية المرة وامسح جسم الهامستر في كل مكان لين يصير شكله كأنه متروش.. وبسرعة نشفه بمنشفة ناعمة عشان مايصيده برد
امسح الاثنين بالمرة وبعد ما ينشفون وينتفش فروهم يعني بعد حوالي نص ساعة حط الانثى والذكر بمكان محايد مثل كرتون كبير يكون ع الاقل نص متر في نص متر.. وراقبهم لو لقحها كان بها ما لقحها رجع الذكر لقفصه وحط الانثى معاه ووفر لهم أكل متنوع.. حبوب وخس وتفاح وجبن مثلا عشان يحسون ان الوضع اوكيه.. وراقبهم واهم شي تكون مستعد لفصلهم بسرعة لو حسيت الذكر ناويها بشر
اهم شي قبل ما تحطهم مع بعض سواء في الكرتون او بقفص الذكر.. امسك الذكر بيد والانثى بيد وقربهم من بعض بحيث يكون الفارق بين أنوفهم قليل جدا حوالي ربع سم! وخلهم يشمون بعض لمدة خمس ثواني مو اكثر.. ثم اقلب الانثى وخل الذكر يشم مؤخرتها بتلاحظ انه بيقرب اكثر وهو يشم لين يلصق انفه بعضوها التناسلي.. خمس ثواني كمان ع هالحال ثم حطهم مع بعض
وخبرني وش يصير معك