السلام عليكم ^_^
انا من 4 ايام جاني همسترين زوج هديه واحد ذكر و واحد انثى بعد ماعلمني المنتدى المتميز كيف اميز...بس عندي كذا سؤال اتمنى تجاوبوني عليه وتساعدوني محتاج نصيحتكم بقوة
.
أولا
:- عندي همسترين روسي ولاحظت ان الذكر اصغر من الأنثى بشكل ملحوظ...فهل العمر يأثر بتكاثر مع العلم اني ما اعرف اعمارهم؟؟
يأثر إذا كان الفرق بينهم كبير.. بس أنا اشوفهم من صورهم عادي.. لكن ممكن يمر شهر بدون ما يصير شي وبعدها يتزاوجون وهذا عادي بسبب فرق الحجم..
لكن مهم جداً تغذيهم زين لأنو سهل تغير حجم الهامستر بالتغذية الكويسة وتقدر تخلي الذكر يفوق الانثى بالحجم في خلال اسبوعين الى شهر وجايك في الكلام بهالخصوص
ولو لا هل بيصير العيب من الهامستر الأنثى لأنه زي البشر ماتنجب لما تكبر ولا مايهم الكبر عندهم ؟؟
الأنثى تنتهي قدرتها على الحمل بعمر السنة
ولو لا هل بيصير العيب من الهامستر الذكر العيب لأنه لما يكبر ما يقدر يتكاثر معاها تعتبر اكبر ؟؟
الذكر تستمر قدرته لين يموت (الروسي من سنة ونص الى سنتين ونص عمره)
(اخر الموضوع فيه صور لهم عشان تلاحظون فرق الحجم
)
ـــــــــــــــــــ
ثانيا
:- الأكل وما ادراك عن الاكل ... ناس تقول الخضروات بشكل يومي مهمه وناس تقول الخضروات بشكل يومي تسبب اسهال
فأنا قررت يومين الأكل فيه خضار (خيار-جزر-خس) ويومين ناشف (خبز-حب-مكسرات-شابوره)
نظامي حلو ولا مايصلح ؟ ولو مايصلح ايش تنصحون ؟
لا ما يصلح
النظام السليم والصحي ان الاكل الجاف يكون متوفر عندهم 24/7 يعني لا تخليهم يحسوا انهم بحاجة لتخزين الاكل خله دايم متوفر وبكمية مناسبة..
الاكل الجاف اللي هو خلطة الحبوب الخاصة بالهامستر وأنصحك بشركة Alex أنا مجربها وأضمن لك الذكر يسمن في اسبوعين وترى الذكور يسمنون بسهولة أكثر من الأناثي لأن نشاطهم أقل في الجري ع العجلة وفي الحركة عموماً
اما الخضار فتعطيه من مرتين إلى ثلاث مرات بالاسبوع على انها ما تكون بيومين ورا بعض
كل ثلاث ايام ورقة خس.. أو حبة خيار (تقطعها لهم قطع صغار)..
ممكن تعطيهم خضار يوم ايه ويوم لا بشرط مايكون من الخضار اللي يحتوي على نسبة كبيرة من الماي مثل الخس والخيار..
يعني عطهم جزر.. قرنبيط اخضر (بروكلي).. هذي ممكن كل يومين بس شي بسيط لا تكثر.. يعني ربع جزرة (تقطعها مربعات صغار).. وردة قرنبيط وحدة.. كافية
وانصحك ما تستغني عن الانثين ذول (جزر - قرنبيط) لأن الجزر يبرد اسنانهم ويمنعها تطول كثير.. والقرنبيط فيه فوائد مذهلة وهو أكثر خضار مفيد للهامستر بلا منازع
المكسرات لا تعطيهم الا شي غير مالح.. لكن بين فترة وفترة رش لهم كمية قليلة جداً من الملح ع الخضار او ع خلطة الحبوب لتعويض نقص الاملاح
والخبز او الشابورة ضروري بشرط تكون بُر او نخالة
وبنسبه للأكل مره ثانية
<--- حده متنرفز من الأكل
الأكل المعلبات مضر للهامستر (( فطر معلب - ذره معلبه - فاصوليا معلبه )) ؟
ما انصحك ابد بالمعلبات.. وفي خلطة الحبوب غنى عن كل شي ثاني
وتذكر شي مهم.. لا تعطي الهامستر أي شي يخطر في بالك إلا بعد ما تسأل لأنه من الحيوانات اللي جهازها الهضمي حساس جدا ومناعتها ضعيفة كثير
الوجبات السريعة بشكل عام (( فشار - بطاطس مقلية - سمبوسه - قيمات بالجبن )) مضره؟؟؟
بكل تأكيد مضرة.. هي مضرة للإنسان وهو قادر يتحمل فما بالك بالهامستر المسكين.. واهم شي ابتعد عن المقليات لأن الزيوت تضره.. وابتعد عن أي شي دسم سواء جبن او اكل بيت او غيره.. خلك دايم على خالي أو قليل الدسم
وأنصحك تعطيهم الجبن بشكل يومي عشان الكالسيوم والبروتين.. لكن بكمية قليلة جداً.. لأن الجبن مو مثل الاكل الجاف والهامستر مايفرق يخزن أي شي فما يضر لو خزن الحبوب الجافة لأنها ماتفسد لكن الجبن يفسد لو خزنه
انا جربت كل انواع الجبن لكن الوحيد اللي يناسب الهامستر هو شرايح الجبن قليلة الدسم.. لا تقول مثلثات ولا سايله ولا غيره.. الشرايح أولا صغيرة وسهلة الاكل للهامستر.. وسهل كمان انك تقطع منها صغار وتعطيهم.. بعكس بقية انواع الجبن.. غير انها طويلة الأجل يعني تشتري علبة وحدة تكفيهم شهر واكثر دام انهم بس هامسترين
ودامهم اثنين.. ربع شريحة يوميا تكفيهم.. لاتزيد ولا تنقص.. وقطعها صغار
العسل يعتبر مضر ؟؟؟
مرة مرتين في الشهر يعتبر جدا مفيد اكثر من كذا رح يضرهم
وانا سمعت السكريات مضره زي الشوكلاته والحلويات وهذا شي متعارف عليه
مو بس مضرة انا اعتبرها قاتلة لأن الهامستر بالذات سهل جدا يصاب بمرض السكري خصوصا الروسي
طيب السكريات من الفواكه (( بطيخ - فراولة - موز -منقا )) مضره ؟
ما تعتبر مثل السكريات لأن سكرها صحي بس برضو كثرتها مضرة.. البطيخ حلو ومفيد لكن مرة بالاسبوع لأن مويته كثيرة.. الفراولة ما ادري عنها الموز والمنقا ممتازين واهم شي تذكر دايم الكمية لازم تكون قليلة على قد وجبة وحدة في اليوم يعني مو طول اليوم ياكلون منها عشان مايصيدهم اسهال وبرضه عشان ما يفسد
وأهم شي انتبه تعطيهم من الحمضيات مثل الليمون والبرتقال واليوسف جدا مضرة
النعناع والبقدونس كمان مضرة جدا
وفي ناس تقول بيض مسلوق...اسلقه عاتي وبعدين اطلع صفار البيض ولا اخليه
البيض المسلوق مفيد للحوامل والمرضعات.. وغالبا الهامستر مايحب البيض كثير الا اذا كانت حامل او مرضعة وهذا شي عجيب لاحظته بنفسي
وطبعا ضروري تطلع الصفار لأنه كله دهون اولا وثانيا يسبب اسهال لأنه خفيف ومفتت
الخضروات الي تحرك (ثوم-بصل-فجل-جرجير ) مضره للهامستر؟
الجرجير مرة مرتين في الشهر وممكن تستغني عنه
البصل والفجل ما ادري عنها
الثوم وما ادراك ما الثوم! كثرته مضرة جدا.. لكنه ضروري مرة وحدة في الشهر (وبس) لأنه مضاد حيوي طبيعي ومنظف لمعدة وامعاء الهامستر ومقوي ومنشط عام.. تقطعه وتعطي كل هامستر قطعة وحدة صغيرة جداً ما تتعدى حجم حبة العدس!
معجنات البقالة او المخبز (سندويش زعتر - سندويش لبنه - لوزين جبن ) مضرة للهامستر؟؟
ابتعد عن الجاهزات ذي لأنها كلها دهون وزيوت ودسم وخلك ع اللي قلت لك عليه
ـــــــــــــــــــــ
ثالثاً
:- اانا عندي سقايتين
<---- مستانس
فجتني فكرة لو استبدل يوم من الأيام الاكل واحط باحد سقايات حليب السعودية او صافيو او عصير طمام تنصحوني اسويها ولا لا ؟؟
انتبه! اكبر غلط عند مربين الهامستر وضع الحليب في السقاية.. هذي انا غلطتها بعد.. ماتنفع لأن الحليب بسرعة يفسد وكمان يخرب السقايات!
لكن عرفت الطريقة الوحيدة المناسبة لاعطاء الحيلب للهامستر وهي غمس قطع صغيرة من الخبز/التوست/الشابورة (البر) في حليب خالي الدسم مخفف بمويه.. وبعد ما تغمسها لازم تنشفها من الحليب بمناديل لين تصير شبه لينة لا تقدمها لهم لينة.. وتعطيهم قطع صغار بكمية قليلة تكفي وجبة وحدة او وجبتين في اليوم.. لأن الحليب يفسد بسرعة كبيرة
الهامستر مايحتاج الحليب للشرب.. يحتاج منه الكالسيوم فقط.. عشان كذا اكتفي بالغموس
انواع الحليب اللي ممكن تستخدمها
1- اي حليب خالي الدسم
2- الحليب المبستر
3- حليب الاطفال حديثي الولادة
وكلها تخفف بالماي
ـــــــــــــــــ
رابعا
:- نشاره القفص اغيرها بعد كم يوم ؟... ولا لما اشم الريحة ؟
دامهم زوج اسبوع مدة ممتازة.. وطبعا لو شميت ريحة قبلها غيرها على طول..
وقبل فرش النشارة الجديدة غسل القفص بالماي الحار.. ثم رشه بمضاد الفطريات او بالديتول المخفف.. وارجع رشه بالماي ثم نشفه < نفس الشي بالنسبة لصحن الاكل والبيت والعجلة واي شي من اغراض الهامستر
وأنصحك بملاحظة فضلاتهم كل يوم او يومين وانت بكرامة.. لأنها هي اللي تخبرك بصحة هامستراتك
اذا لقيتها (ومعليش تحمل الوصف) لونها فاتح مره ولينه معناه عنده اسهال او مقبل على اسهال
واذا كانت كثير غامقة ومتقطعة قطع صغيرة وموصولة ببعض معناه عنده امساك
واذا كان لونها عادي وحجمها عادي معناه هامسترك صحته آخر حلاوة ومبسوط
وعلاج الاسهال العادي: منع الخضروات لمدة اسبوع والإكثار من الحبوب الصلبة
علاج الامساك: زيت زيتون تقطره في فمه < جدا سهلة تمسكه باصبعينك من قفاه وتسحب بشويش بحيث تجبره ع الابتسام.. وتقطر قطرة أو قطرتين بالكثير وهو رح يشربها على طول.. وممكن بعدها تعطيه ورقة خس عشان تساعد على التخلص من الامساك
ــــــــــــــــ
خامساً
:- كيف اعرف الأنثى بتولد موب حامل اتمنى ان الفكرة وصلت يعني كيف اعرف انها الحين بلحظة ولاده ... هل تطلع اصوات مواء زي القطاوة ولا اشوف افرازات تطلع منها ولا كيف ؟
ابي لحظه الولاده موب اعراض الحمل
النشاط الزايد.. وهذا سهل انك تلاحظه لأن الهامستر في الايام الاخيرة من الحمل تكون خاملة وتعبانة.. فاذا شفت نشاطها زاد اعرف انها ع وشك ولادة بس متى بالتحديد الله اعلم
اللي يحضرون ولادة هامستراتهم نسبة قليلة ما تتعدى 20% من المربين.. وتكون بالمراقبة المستمرة أو بوضع كاميرا وتركها تسجل او بالصدفة البحتة.. لأنها ما تصدر أي صوت ورح تختار اكثر مكان مظلم ومخفي بالقفص وتولد فيه
وحده من هامستراتي الحوامل شفت نشاطها زاد وحطيتها جنبي وقعدت اراقبها.. راقبت راقبت لين طلع لي قرون ورجعت ع اللاب شغلت فيلم يوم خلص التفت لقيتها ولدت 10 بيبيز وقاعد ترضعهم
ــــــــــــــــــــ
سادساً وا اخيرا
/ هذي صورتين للهامسترين الجماعية تبين الفررق بالحجم بالصورة الأولى فكم تقدرون اعمارهم وهل في تكاثر ولا مافي تكاثر بالفتره الحالية ولا مافي تكاثر نهائي ؟؟
والصورة الثانية تبين لكم حجم الأنثى وهي زي مكوره نفسها فهل تعتبر حامل بنسبه لهامستر روسسي ولا عاتي حجمها ؟
.....................
اسف كثير كثير على الأطاله
.....................
الصورة 1
اعمارهم صغيرة والذكر اتوقع شهرين والانثى ثلاث وهذا شي طيب بس زي ما قلت لك لا تستعجل على الذكر عطه فرصة يكبر ويتغذى كويس
......................
الصورة 2
