[الدلع]

وعليكم السلام ورحمة الله وبركاته
حياك الله
ماشاء الله لا قوة إلا بالله .. الله يحفظها ويخليها لك تدنن ذا الصغينونة
الشيرازي المون فيس شكل وجهه يفتح النفس ومطلوب من الكثير
أنا أشوف انك طحت على بسة حلوة في النوع والمواصفات واللون
المرة الجاية لا تاخذ بساس من المحلات أبدا وعندك قسم البيع طب وتخيّر واشرط على راعيها تتقابلون عند طبيب بيطري يكون أحسن حتى تضمن بإذن الله خلوها من الأمراض الي ممكن تتفاجأ فيها لما تاخذها للبيت .. وعمر الشهرين بالنسبة للبسة ممتاز في مسألة تدريبها على أي سلوك تحبه وتعويدها على أكل معين يعني تقدر تعسفها قبل ما تكبر
ماشاء الله أخوك خطير وضرب على الوتر الحساس في مسألة انك أساسا تحب الحيوانات فما لقى صعوبة في إقناعك وما دمت حطيت الاهل قدام الأمر الواقع فضروري تجتهد في إقناع الوالدة الله يحفظها ويخليها لكم لأنها والوالد أهم فردين في البيت مهم الحصول على رضاهم
ما دمت استعديت بأغراضها فموضوع تربيتك لها جدي يعني خلك باستمرار متابع للقسم بحيث لو كان عندك أي استفسار أو حصلت عندك مشكلة بسهولة تلقى الحل في مواضيع القسم أو بفزعة المشرفات والأعضاء وما راح يقصرون بإذن الله
تربية البسس مسئولية مو خذني جيتك وبما انك انت واخوك جبتوها فوزعوا بينكم مسألة العناية فيها حتى ما تكون على واحد منكم وبعدين يطفش ولو اشترك معكم أحد من الأهل المستعدين لذا الشي يكون أحسن
حلوة الحركة الي ورا البسة في الصورة الخامسة
البسس جنونهم ينحبسون في قفص وخصوصا وهم صغار فانتبه تحبسها وخلها على راحتها تسرح وتمرح وتفحّط لكن اهم شي تحرص على مسألة النظافة حتى الوالدة ما تضيق زيادة وبعدين يصعب إقناعها كلش إلا زعل الوالدة
بالتوفيق اخوي