[راعية الجيرمن]

السلام عليكم

هذا اول موضوع احطه فالمنتدى

وكنت اتمنى هالشي ما يستويلي


من اسبوع شريت قطوة عمرها شهرين

انا عندي قطو ذكر بس حبيت اييبله قطوة عشان يستانس وياها بالذات انه صغير ويحب يلعب واايد

المهم القطوة لي شريتها لونها ابيض بالكامل بس فيها خط رمادي على جبينها وعيونها لونهم ازرق و رمادي


ما تتخيلون كيف حبيتها وكنت اخاف من اي شي يزعلها او يتعبها

كنت ارقدها وياي ويوم اكل ااكلها وياي وهي طول الوقت لاصقه فيني وتحب تلعب وياي وتعضضني وتركض عشان الحقها.. والله هالقطوة كانت غير رغم انه عندي كلبين وقطو وانا لي اهتم فيهم بس عمري ما حبيت او اهتميت فحيوان كثر ما سويت وياها حتى يوم كنا بنبات ليله فالفندق اتصدقون وديتها وياي معا انه ممنوع بس خبيتها فالشنطة وشليتها وياي

قطوتي سميتها كيتي

بس للاسف امس كانت تاكل والاكل تعلق شوي منه فخشمها ,, انا يوم شفته خفت لا يتعلق فخشمها غبار او اي شي و تمرض لانها صغيرة وحساسة قمت ابغي انظفها وحاولت انها تكون هاديه وما تخاف لاني كنت بس ابغي امسحها بالماي وهاي مب اول مره بس مادري شو استوى فيها تمت تصيح وايد فشلتها وقلت خلاص مب لازم لانه حسيتها خايفة حطيتها فحظني ومسحتها

بس فجأة استوت ما تتحرك .....ماتت.....


انا لين الحين مب مصدقه ولين الحين خايفة اني اكون السبب بالي استوالها حاسه بالذنب

امس طول الليل ولين الحين كلما اذكرها اصيح

مب عارفه شو اسوي

قلبي معورني عليها وكل ما انسى ارجع اذكر لي استوى امس


بس ما اقول غير الحمدلله


انا اسفه لاني يمكن عورت راسكم بس والله من حرقة قلبي عليها

هذي صور كيتي

http://www.9q9q.org/index.php?image=PSOHidSOopk
http://www.9q9q.org/index.php?image=KNJ9a0fBAsR