[الدلع]

وعليكم السلام ورحمة الله وبركاته
عاشقة قطوتها : الله يعينك وييسر أمرك ويسخر اختك لك آمين يارب
بصراحة مشكلتك توجع القلب وفتحتي لنا فيها باب السواليف فالعذر والسموحة على الاطالة وهو ما يخرج عن كونه اقتراح وراي شخصي لعل الله يصلح الأحوال .
شوفي يا عزيزتي
أنا مع الجميع في انك ما تستسلمين واستمري في التمسك في بستك لأنه لا يوجد أقسى على النفس من فقد شي قريب منك وتحبه وهذا الشي جربته بنفسي لأني ربيت من مدة طويلة عدد كبير من البسس البلدية وحبيتهم واجد لكن الوالد لما شاف عددهم صار يزيد أصر على التخلص منهم في المزارع ( على الأقل أحسن من الشارع عندهم عمال ياكلون ويشربون وعصافير وغيرها ) وقعدت بحزني وحسرتي لحد ما رزقني الله بثنتين من نوع ثاني بس تبغين الحقيقة ما حسيت معهم مثل ما كنت احس مع البلدي مدري العيب فيني ولا فيهم
في البداية لازم نوضح إن الموضوع مرتبط بعلاقتك الأسرية مع اختك وهذي نقطة حساسة جدا فلازم تحاولين التوفيق بين علاقتك معها وحبك لبستك وحرصك على عدم التفريط فيها .
إذا كانت اختك معكم في البيت فلا تردين عليها بنفس اسلوبها في الاستفزاز وتجاهليها لما تتكلم عن بستك وكأنها مي موجودة ولا قالت شي وحاولي على قد ما تقدرين تمسكين أعصابك لأنك لو رديتي بتضل تستمر في استفزازها وبتتناشبون مع بعض وما راح تنتهي السالفة وبتظل تكرر هالدعاوي في الرايحة والجاية ولا تنسين ان هذي اختك الكبيرة ومهما صدر منها يظل حقها في الاحترام باقي واحرصي تبعدين البسة عن اماكن تواجد اختك والحمد لله مادامك منتيب الوحيدة في رضاك ومحبتك للبسة فلا تهتمي ترى صحتك أهم من كل شي .
أما ما يخص البسس الي تذكرين انها دعت عليهم وماتوا واندعسوا فمو شرط تكون دعاويها هي السبب ربما شي وكتبه الله عليهم ولا يظن أحد إن كل من دعا يستجيب الله منه .... ( الدعاء ) له شروطه حتى يقبله الله ومتى ما توفرت قد يستجيب الله في الحال وقد يؤخره لبعدين لمصلحة يراها سبحانه وفيها خير للداعي فلا تخلين الشيطان يوسوس لك ويلعب باعصابك والي كاتبه الله بيصير وكل شي بقضاء الله وقدره.....طيب لما تشوفينها تدعي عليهم سوي مثلها وادعي لهم ( يمكن البعض يستغرب هذا الشي ) عن نفسي أشوف انهم يستاهلون ومخلوق من مخلوقات الله الجميلة والمحبوبة و مهيب خسارة فيهم <<<<< رأي شخصي
أما اذا كانت اختك متزوجة وبرا البيت فسوي نفس الشي لكن زيدي عليه انك تعزلين البسة في مكان ثاني وحطي لها اكل وشرب وادخلي عليها كل شوي حتى ما تحس بفقدك .
وفي كلا الحالتين الموضوع ما يستاهل يكون بينك وبين اختك قطيعة عشان شي ممكن حله بسهولة بس يحتاج منك شوي هدوء يعني باختصار حطي أعصابك في الثلاجة .
أما فيما ذكرته الأخت مشاعل الرياض فاقتراح جيد في حال تأزم الحالة وعدم وجود أي مخرج منها ( وان شاء الله ما تحتاجين تعرضينها تبني ) .
الجمعية فيها بعض الصعوبة لأن فيه عضو في منتدى ثاني ( نشفوا ريقه ) حط بسته في ذا الجمعية ولما سألته عن الطريقة قال فيها شوي تعقيد لأن الدكتورة ما تتكلم عربي وعايشة في مجمع سكني يسكنه أجانب وعليه حراسة ولا يسمحون لك تدخل إلا بعد ما تتواصل الدكتورة مع الامن ويسمحون لك بالدخول ( هذا وهو رجال أجل الحرمة وش بتسوي ) عشان كذا إمسكي بالبسة بيديك واسنانك ترا فيه كثير يتمنون ربع بسة ما لقوا
nO lOvE8 : اعذرني على اللقافة بس والله الموضوع ما يستاهل تاخذ بيت وتطلع لحالك عشان أهلك ما رضوا بالبسة وتذكر أن الجنة لا يدخلها قاطع رحم وانه ما عمر الزعل والعصبية جابت شي مفيد والأفضل منها إنك تتودد لوالديك وخصوصا الوالدة وتروح تحب على راسها ويديها وتستلطفها وتحاول ترضيها بأي وسيلة وبعدما تحس انها رضت عليك افتح معها موضوع البسة ووش الاشياء الي تدفعها لرفض وجودها في البيت وكذلك باقي الأهل وتعال للمنتدى وابحث عن اي شي يخص ذا المشاكل وكيفية حلها وان شاء الله ما يكون الا كل خير ترا رضا الوالدين سبب كل حياة سعيدة بعد رضا الله سبحانه وتوفيقه وكل مشكلة ولها حل بإذن الله .
( أتمنى لكما التوفيق وين ما كنتما وان شاء الله نسمع عنكما باستمرار أخبار طيبة مع بسسكما وأسرتكما ( تراهم جزئين صعب تفصلونهما من حياتكما ) <<<<<< غطيت على سيبويه )واكرر المعذرة على الاطالة .