السلام عليكم ورحمة الله وبركاته
يامرحبا اخوي ابوسارة
بما انك جديد على الشغلة احب اذكرلك بعض الامور يمكن تختصر عليك المشوار
اولا وقبل كل شي خصص لك اسبوع زمان تقرأ كل صغيرة وكبيرة عن الطيور بصفة عامة والبغبغاء بصفة خاصة
*انواعها
*عاداتها
*مصادرها
*غذائها
*طرق تربيتها ومعيشتها بالاسر
*متطلبات العناية بها
ويمكن الاستعانة بالنت من مواضيع ومقاطع فيديو واستشارة اهل الخبرة
بعد هذا اذا حسيت انك قادر على الوفاء بمتطلبات هذه الطيور باكمل وجه فتوكل على الله وشوف الطير المناسب لامكانياتك والاقرب لك لان هذه الطيور اذا الله ستر عليها ممكن يتوارثونها احفادك منك لانها معمره.
نرجع لصلب الموضوع:
اول معلومة لازم تعرف ان الافريقي والهولندي اصلهم وموطنهم واحد لكن الفرق ان الاول يجي صيد من الغابة والثاني تفريخ مزارع وهذا الشي يفرق بالسعر الضعف عشان التفريخ غالبا يجي اليف وهادي لانه متعود على البشر.
الاختيار انت اللي تحدده اذا كنت تبي تبدي من الصفر مع افريقي متوحش وتتحمل مصاعب التدريب وعندك وقت يوصل حوالي 3 شهور حتى تصير بمستوى التفريخ من الالفة والهداية والا خلك على التفريخ او المسمى بالهولندي على شرط يكون فيه حجل معدني صك لايمكن فتحه حتى لاتاخذ شي مغشوش
وبما انك جديد فابو 4 شهور راح يكون غالبا ينعس او ينغر (يعني لازم توكله بنفسك) وهذي اظن صعبه عليك
اما اذا كان يعتمد على نفسه فاكيد كل ماكان العمر اصغر كان اسرع بتقبل التدريب من الكبير
اما الاسعار فلا اعلم عن الرياض لكن سعر الكويت واظنه متقارب مع اسعاركم
الافريقي الفرخ وحش جامبو بين 6 الى 8 شهور 70 الى 80 د.ك
التفريخ بين 5 الى 8 شهور ابتداء من 170 د.ك
*ملاحظه
استخدم القاعده الصينية في اتخاذ القرار
اذا بغيت شي اجل تنفيذه 3 ايام واذا مازلت مصمم عليه فتوكل على الله واذا شفت نفسك متردد اتركه حتى لاتكون متسرع باتخاذ القرارات
مع اطيب التمنيات
اخوك ابو احمد