[Juvawi]

السلام عليكم

lمس اخيرا لقيت كاسكو دخل قلبي من اول نظره .. كنت ادور كاسكو هولندي محجل (عليه حجل ذهبي في رجله اليمين و عليه كود مو مفهوم) و فرخ لا يزيد عمره عن 8 شهور و يكون ما يجعر ولا يخاف .. و مريت سوق الحمام عندنا في الكويت و دشيت محل فيه تقريبا 15 كاسكو صغير .. و قعدت اراقبهم لمدة نصف ساعه تقريبا العب مع هذا و اتحرش في ذاك و اشوف ردة الافعال لحد ما شفت هذا اللي حسيت انه اللي ادوره

و لله الحمد من اول يوم تأقلم معاي و ما شاء الله جريء و ما يخاف و اول شي قاعد اعلمه المسح على ظهره و لله الحمد استجاب معاي .. بس اتمنى اقدر اعلمه الوقوف على اليد و ان شاء الله بمشي على نصايح بعض المواضيع في هذا المنتدى ..

ان شاء الله يوم الاحد بوديه البيطري لفحص شامل .. و تقليم اظافره و قرض جناحه .. لانه اتعبني يطير في الغرفه و يدعم الطوف و بصراحه خايف عليه يعور نفسه .. ولا ايش رايكم؟ .. صارله عندي الحين بس يومين .. و عمره المفروض 7 او 8 شهور .. هذا الوقت المناسب لقرض الجناح او لا؟ و ايش تنصحوني فيه نصايح عامه؟ و اتمنى رايكم بكل صراحه في زيزو و قولوا ما شاء الله اذا عجبكم


و شكرا و ان شاء الله راح اكون صديق دائم لكم في هذا المنتدى الطيب