[Abby]

السلام عليكم ورحمة الله

عذرا على التأخير

انا كلمت الدكتور الي كنت حابة استشيره, ذكرت له الي صار بالتفصيل

وهاذا رد الدكتور بالتفصيل:

التركيز في الشكوى حيكون على نقطة "العملية".
أولا:المواد الغريبة عن الجسم زي الي في حالة قطتك لازم عملية جراحية, ماينفع بأدوية ولا زيوت وكلام فاضي زي الي قاله الدكتور اول مرة

المشاركة الأصلية كتبت بواسطة Abby

وعلى طول اخدتها لنفس العيادة..فحصها دكتور تاني غير الاول وقال تبات عندنا نجرب بمواد كميائية معينة وزيوت يمكن يخرج وكمان لازم نعملها اشعة..

ثانيا: مافي شي اسمه "يسوو عملية ومايطلعو كل الخيط..يا انه يستأصلو الخيط كله..يا انه مايسوو العمليه من الاساس"

المشاركة الأصلية كتبت بواسطة Abby

وقالي : احنا عملنا العملية "اليوم" بس ماطلعنا كل الخيط لأنه في مكان صعب نطلعه ممكن يآذيها لكن حنديكي علاج تستمر عليه وحيطلع بقية الخيط! واحسن تاخدوها الاحد!

ثالثا: عدم المصداقية انه كل دكتور يدعي انه هو الي سواها وكل مرة يقولو سويناها في اليوم الفلاني هاذا دليل على انه في مشكلة وتلاعب

المشاركة الأصلية كتبت بواسطة Abby

رحت الأحد آخدها..والله ياجماعة كل ماقابلت دكتور يقولي انا الي سويت العملية(لأني طلبت اقابل الكتور الي عمل العملية)..الي اتواصل معاه على رقم الطوارئ مفهمني انه هو الي عملها..الي عالجها اول مرة وهو نفسه الي ع الريسبشن يقولي انا!! طبعا هم مايدرو اني سألت اكتر من دكتور!!

المشاركة الأصلية كتبت بواسطة Abby

((وللمعلومية هادا تالت دكتور يقولي انا عملت العملية!))..

المشاركة الأصلية كتبت بواسطة Abby

ولمن جلست استفسر زيادة جاني الدكتور الي كان قاعد يعمل العملية..في نص عمليته وبيده القلفزات والادوات يجي يكلمني ويرجع(كذا مرة)! وفي النهاية اكتشفت انه هو الي عمل العملية!!!

رابعا:الاستفراغ الاسود دليل على انه كان في شي غلط في العملية, يا اما انهم ماقفلو الي فتحوه مزبوط وصار نزيف, يعني باختصار في مشكلة داخلية هم سببوها

خامسا:التشخيص الخطأ, كان المفروض من اول ماجبتيها لهم سوو لها العملية, يعني تشخصيهم الخطأ زاد المشكلة وعقدها.

أما عن الادلة الي احتاجها:
فسألته اذا يحتاج اروح اخذ ملفها منهم عشان احتفظ فيه كدليل, قالي اصلا ماراح يعطوكي الملف, لكن اذا عندك الفواتير حقتها فهي تكفي مبدئيا لأنهم احتمال ينكرو انكم جبتوها عندهم

وقالي انه هم يسوو لجنة وحتتم مسائلة الدكاترة لو انا رفعت الشكوى

_________________________________________

هاذا كلام الدكتور

لكن انا حابة اخذ رأيكم انتو

الان حسب الي فهمته من الدكتور انه كل شي يعتمد على كلام الدكاترة في المسائلة
وهم غالبا حينكرو وماحيعترفو بأخطائهم

فأنا فعليّا افكر اروح العيادة,ماراح اقولهم انها ماتت, راح اقول مثلا وديتها عيادة ثانية والدكتور طلب يشوف ملفها عشان يعرف الحالة,فأعطوني نسخة من الملف والاشعة(لو كانو سوو لها اشعة من الاساس)
اش رأيكم؟ ينفع اسوي كذا؟..هل ممكن يعطوني ملفها والاشعة؟ أو هل حيرفضو ويصير بدال ما استفيد خليتهم يحسو اني ممكن ارفع شكوى؟
هل سبق لأحد قبل كذا اخذ ملف من عيادة بيطرية؟
وهل عندكم نصايح اخرى لي؟

وجزاكم الله خير على تعاطفكم وتفاعلكم معايا, عن جد ساعدني تعاطفكم وتعازيكم
بصراحة لما سجلت في المنتدى خصوصا عشان اكتب استفساري وقصة بستي والعيادة, ماتوقعت كل هاذا التعاطف, توقعت انه اكثر الاعضاء يستهينو بموضوع الشكوى عشانها قطة مو انسان(زي ما اسمع كثير من الناس الي حولي)
الله يجبر بخواطركم جميعا ويرزقكم جنة الفردوس ياااااااااااارب ..بجد انا ممتنة لكم