[wwvip]

السلام عليكم

اخواني قبل كم يوم اعطاني زميلي حبتين قطاوه شيرازي عمره تقريبا 5 اشهر

المشكله اني عزوبي

وحطو تحت ذا الكلمه الف خط

يعني الاكل عندي كلش نواشف " خبز وجبن وان تهورت مربى "

طبعا صراحه لي ايام ما اعطيها الا تونه مره وحده باليوم

الصباح احيان جبن وصارت معاد تاكله

التونه تدورها بالتلسكوب بس تشم الريحه تجي تمشي مليون

طبعا بقولكم ليش اعطيها تونه

لان هايبر بنده مسويه عرض 6 حبات ب 10 ريال

الفتره الاخير لاحظت ان وحده منهم صاير عندها مشاكل بالصرف الصحي
خاصه انها عصلا << لغير الناطقين بالسعوديه يعني نحيفه قدن قدن !!

انا اذكر ايام الارانب << راعي سوابق
كان الارنب اذا جاه مشاكل بالصرف الصحي ونحف زايد
نعطيه كابكت حق الاطفال لمده اسبوع وتنتهي اموره
ونقطع عنه الاكل الاخضر ونخليه على الجاف فتره ونضبط له مواعيد الاكل

بس هذا قطو ومدري هل ينفع معاه الكابكت !!
بعدين هو ما ياكل اخضر كلش سمك تونه اللي 6 بعشره

المطلوب الان

الحل للنحافه والحل لمشاكل البطن ...!

الامر الثاني بالنسبه للاكل

انا جتني فكره جهنميه صراحه

خاصه اللحين مسوين عروض على الماكولات ببنده

انا قاعد افكر .. اشتري نقانق دجاج + همبرجر دجاج ولحم + مرتدلا بقر
واسوي عليها خلطه عزوبيه ويصير هذا اكلها كل يوم
مره نقانق ومره كذا ومره كذا

لان ماعاد فيني صراحه اشتري تونه او اكل معلب
وانا من النوع اللي ما اطبخ لنفسي

وش رايكم هل كثرته تضر ؟؟ اقصد النقانق والهمبرجر
لاني بصير اقليها بالزيت واحطها بالثلاجه وكل وجبه اعطيها منها

عندي كمان استفسار


هل القط يكره اللمس مع البطن !!
لاني كل ما لمستها يا تعض ولا تمخش !!

انا اذكر الكلاب تلمس بطنه يصير عبدك الذي لا يعصاك ويجي يتسدح عندك مثل اللي يقول تكفى امسك بطني


عموما يا اصدقائي منتظر الاجابات

وادعوا لي بالزوجه الصالحه