|
اهلي يبغون يبيعون قطوتي !!!!!!
السلام عليكم اهلي ، او بالأصح اختي ، تبغا تبيع القطوه ، و هي تقول اني ما اعتني فيها ، و هي غلطانه والله اني اعتني فيها ، لكن هي دايما في غرفتها و لا تجلس معاي ابدا ما تجي الا وقت الغدا ، و احيانا تمر ايام ما اشوفها ، و تقول لي انتي ما تعتنين فيها لازم ابيعها ، اصلا متى تشوفني ان اعتني فيها ولا لا و الله حرام عليها ، صحيح ان القطوه بفلوسها لكن هي قالت لي انا خلاص ما ابغا اعتني فيها خذيها انتي اعتني فيها ، و قالت ترا انا متبريه منها اي شيء يجيها في ذمتك ، و قبل ايام تقول لي انتي ما تعتنين فيها ، الله يخليكم قولو لي وش اسوي ، حاولت اتفاهم معها ماا فااد ما تعرف تتفاهم مع الناس ، و المشكله هي اختي الكبيره يعني لو انها اصغر مني كان هاوشتها و رفضت انها تبيعها ، و دايما اذا جيت اكلمها في هالموضوع تقعد تهاوش فيني و تسوي لي فيها انا الصح ، مع انها ما تدري ان كل كلامها خطأ الله يخليكم ساعدوني كيف اقنعها انها تخليها؟؟ |
رد: اهلي يبغون يبيعون قطوتي !!!!!!
ممم حراااام قلبي عورني عليج:(
لان انا بعد كان عندي قطوه و طلعوها من البيت .. المهم حاولي انج تبينين لهم انج مهتمه فيها يعني مشطيها كل يوم و احرصي انج تحطين اكلها بنفسج و تولي سباحتا و تنشيفها ... وبعدين خليها تتعود انها اتم في غرفتج و تقعد معاج .. و هي ان شاء الله بتتعلق فيج و ما بتهدج و بتخلي اختج تقتنع ^^ |
رد: اهلي يبغون يبيعون قطوتي !!!!!!
مشكوره اختي ..
و ان شاء الله رااح اعمل كل جهدي عشان اخليها |
رد: اهلي يبغون يبيعون قطوتي !!!!!!
ولكمو اختي Sugar من زمان مالك مشاركات ^.^ المهم بالنسبة لاختك انتي لو امك ماعندها مانع بالقطوة وتشوفك وانتي تعتنين فيها او ابوك خليهم يكلمون اختك ويعلمونها انك تهتمين فيها ومو مهملتها والا انتي اشطري على اختك انها تراقبك لمدة 5 ايام او اسبوع عشان تعرف انك تهتمين فيها وبعدين تقرر وبالتوفيق ان شاء الله والله يعينك |
رد: اهلي يبغون يبيعون قطوتي !!!!!!
ماكووو شغل شنوو قوليلها انا اشتريها منج هاذا حل
قوليلها شنو انا احبها وان طلعت بطلع ورائها وما راح ارد قوليلها خلاًص خليها بالبيت شنو المشكله انا كل يوم اعتني فيها وانتي ما تشوفيني واذا مو مصدفه بالطقاق والقطوه ما راح تنباع وحطيها بدارج وقفلي الباب وعصبي وسوي روحج زعلانه وما تاكلين بس وقوولي انج تعودتي عليها ما تقدرين على فراقها لو ساعه وقولي لو انا ما اعتني شلون اهي نضيفه وشعرها نضيف وجسمها مو ضعيف ؟؟ |
رد: اهلي يبغون يبيعون قطوتي !!!!!!
انا واجهتني نفس المشكلة ربيت قطتي الي صورتها في التوقيع واضحة المهم ربيتها لمدة سنتين ومع ذلط اهلي طردوها رغم تعلقي الشديد فيها واعطوها لناس تانية وحسب مسمعت انها قطتي هربت من عند الاس وانا ما بعرف مصيرها وقلبي عليها متل النار من كتر ماحبها تمنيت لو اني اعيش بدار لوحدي حتى تبقى قطتي معي لكن للاسف راحت مني راحت بابسي مني |
رد: اهلي يبغون يبيعون قطوتي !!!!!!
بلوة هالخوات بلشه سووده
سمعي اولشي تفاهمي معاها ولاتعتمدين علا اي احد من بيتكم فالعنايه بالقطوة واذا علا الفلووس وصج تبين القطوة صكي علا روحك من مصرووفج جمعي وعطيها قيمه القطووة وشيلي منهاا خصووم مال ذيج الفتره تعنين بالقطوة عشان تطلعين عينها ههههههه بس اذا مافاد اشتريها بس منها وانتي اعتني فيها بروحج وتحملي مسؤليتهها و خليها بغرفتج دايما الا اذا انتي بتطلعين من الغرفه فالبيت خليها معاج واي شي تحتاج القطوة لاتاخذين من احد واذا تحجت قوليي لها انتي اصلا مو فالبيت وهي فذمتي انتي شماثره عليج مسكينه القطووة ثاني شي قولي لها اذا طردتيها من البيت وصار فيها شي فذمتج لانه مره دشت النار بسبه عذبت قطووة وخلج قويه وطول ماانتي محافظه علا صحتها معليج من احد خصوصا اذا انتي مهتمه فيها وماتسبب اي ضرر لاي احد من هلج واذا كلش كلمي امج او ابوج او احد عوود من هلج خلي يتفاهم معاها واذا كلش قولي لهم هذي القطوة تعلقتي فيها وخليعتبرونها مثل ولدج ومحد يجرب منها وعن تجربه انا تاريخ 8-5-2008 شريت قطوة من بيزاتي وكل غراضها تخيلوا حتا معجون اسنان وفرشان اسنان وبودره كلشي مال قطاوة وبيطري ومعقمات وحاله حطيتها فحجره الخدامه لين مارحت اشتري قفص مارجعت الا امي منهده فيني وعصبت وطلعت من البيت لما رجعت حسوا علا دمهم يقولون لي احنا معترضين بسبه انها فحجره الخدامه قلت لهم شله يايبه قفص عيل الحين وقررت ثاني يوم ارجعها واكو يبت قطوة ثانيه واصغر منها واعناد بخليها اذا انا فالصاله تتمشا فالبيت لكن اذا انا محد بخليها فحجرتي واصك الباب وحذرت كلمن الي يصارخ جدام قطوتي او يحن عليها وصار فيها شي يدفع قيمتها طبعا المبلغ عوووووود فيخافوون ههههههههههههههههههههه |
رد: اهلي يبغون يبيعون قطوتي !!!!!!
طبعا هما جذي صااروا عقب ماشافوا الاصرا ر عليها ومعتمده علا روحيو متكفله فيها
طبعا انتي اولشي خلج بالطيب لكن اذا كلش عندج الحلوول ترا اكره شي جذي لانه كان عندي بط وخذووه غصب واتدرب خيل من وانا صغيره وكنت بدش ماراثوون اخر شي طلعوا اشيا واعذاار فالحين تعلمت لما يشوفوني متمكسه في شي خصوصا ماياثر عليهم مايقدرون يتكلمون |
| جميع الأوقات بتوقيت GMT +3. الساعة الآن 01:31 PM. |
Powered by vBulletin® Version 3.8.8 Alpha 1
Copyright ©2000 - 2025, Jelsoft Enterprises Ltd
الحقوق محفوظة لمنتديات تو زوو