|
velvet جننتني
السلام عليكم و رحمة الله و بركاته
بستي velvet طفشتني في حياتي في كل محل تمشي ورايه من يوم اخلص الدوام و ارجع البيت تسمع بس صوت الباب ينفتح تلصق فيا اقول يا واد حرام اقوم اشيلها و العب معاها شوية و اشوف ايش محتاجة بعدها ابغى اغير ملابسي لا و هيا ورايه و تقعد تستناني الين اغير ملابسي رحت المطبخ ابغى اكل وراية تنزل و تطلع تنزل و تطلع تنزل و تطلع فوق رجولي لدرجة ماصرت اكل زي الناس ... ابغى انام شوية ارتاح ... لا و هيا برضو ورايه اقول ياواد حرام خليها تنام جمبك ... المشكلة مو في كدا ... انها كل شوية تتحرك من مكان الى مكان مره على صدري مره على يدي و مره تقعد تشم فيا ههههه و كل شوية داخله طالعه من تحت البطانية من جد صار عندي ارق في النوم بسببها ... لاتكون فاكرتني امها و انا مدري اي شي اسوي في حياتي الا و هيا معايا من جد الله يكون في عون كل ام على تربية اولادها انا بسه و ماتحملتها فما بالك باطفال ههههههههه سؤالي هل دا شي طبيعي للقطط ؟ ولا السلوكيات هادي راح تتغير لما يكبرو ؟ |
رد: velvet جننتني
اخي القطط الصغيرة تحتاج عنايه واذا ارتاحت مع صاحبه تحبه لكن لو صغيرة عادي اما لو كبيرة مدري
|
رد: velvet جننتني
يا حليلها
كم عمرها ؟؟ ومن متى وهي عندك ؟؟ |
رد: velvet جننتني
هادا شي طبيعي ان هي صغيره في السن حاول تلعبها لغاية ماتتعب وتنام
او اكلها وشبعها حتنام على طول بس هي تحبك وتستفقدك لمن تكون برا البيت ولمن تكبر تتغير الله يحفظها لك |
رد: velvet جننتني
ماشاء الله عليها واضح انها تحبك جدا ومعتبرتك انت الام والاب لها
سلوكها يعبر عن الحب الشديد للمالك . لو كان هناك قطط اخرى معاها في البيت كان من الممكن يخف تعلقها فيك . |
رد: velvet جننتني
السلام عليكم و رحمة الله و بركاته @هاوي القطط ولكن بلا جدوى دا حب يطفش هههههه @#مايا# عمرها 3 شهور و يومين بالظبط .. و امها ولدتها عندي @امال شاعر باكلها و بشبعها بتنام ساعة و بترجعلي كانها بتقولي ( وحشتك صح ) ههههه @الخبيرة ناديا جبتلها بستين رافضتهم تمااااما .. و تابعت موضوع تقديم قط جديد لقط قديم برضو مافي فايدة ... منى عارف ايش سبب رفضها للقطط التانية .. مع انو البسس التانية ما بيسولها شي جالسين في حالهم هيا الا تروحلهم تضربهم و تجري |
رد: velvet جننتني
يا حليلها انا سألت عن العمر عشان اشوف لانه لو صغيرة تكون تعتبرك امك وهي تحبك
وخصوصاً انها عندك من ولدت والله يحفظها من كل شر |
رد: velvet جننتني
وعليكم السلام ورحمه الله وبركاته
ماشاءالله يابختك فيها احلا شي تعلقهم وخصوصا بهالعمر تعتبرك امها ولما تطلع هي تفقدك فتعبر لك عن وحشتها اما النوم مو شرط تتغير لما تكبر فيه بعضهم يكبروا ونفس التعلق ضمها وخليها تنام معاك ولما تتحرك قولها لا وامسح على راسها لحد ماتهدا وتنام ربي يحفظها لك |
رد: velvet جننتني
جبتلها بستين رافضتهم تمااااما .. و تابعت موضوع تقديم قط جديد لقط قديم
برضو مافي فايدة ... منى عارف ايش سبب رفضها للقطط التانية .. مع انو البسس التانية ما بيسولها شي جالسين في حالهم هيا الا تروحلهم تضربهم و تجري هل من سبب ؟ |
رد: velvet جننتني
ماعليه اخي الغالي
بعض القطط تحتاج للصبر وللوقت حتى تتاقلم مع القطط الاخرى هناك خطوات عليك تنفيذها وباذن الله تنجح معاها: 1- ضع القط الجديد مع قطك في غرفه مغلقه لاسبوع مع وضع الاكل يوميا والجلوس معاهم كم ساعه فقط يوميا ..وبقيه اليوم يتركون لوحدهم. 2- يجب عليك تقصيص اظافرهم الاثنين حتى لايتعرضون للاذى . 3- بعد انتهاء الاسبوع اخرجهم عندك في غرفتك او في البيت مع مراعات عدم العطف على قط وترك الاخر اي عليك معاملتهم بسواسيه . وباذن الله تبشرنا بالاخبار الطيبه . |
| جميع الأوقات بتوقيت GMT +3. الساعة الآن 05:26 AM. |
Powered by vBulletin® Version 3.8.8 Alpha 1
Copyright ©2000 - 2025, Jelsoft Enterprises Ltd
الحقوق محفوظة لمنتديات تو زوو