تصرفات بسة شوارع معي فكيف انا اتصرف معها
 

السلام عليكم ورحمة الله وبركاته
في بسة من بسس الشوارع تعرفت عليها > حلوة تعرفت عليها
تعرفت عليها مالها اسبوع تقريبا وبعدين حطيت لها اكل لمدة3 ايام وبعد ماتغلق اكلها تجي تتمسح في رجلي وتطلع اصوات خفيفة وغريبة كأنها شخير (بس اول مرة مو على طول سمحت لها ) واليوم الرابع ماعندي شي اعطيها هو وقعدت تقولي مياو مياو وماقدر اسويلها شي وبعدين في اليوم الخامس اللي هو امس اعطيتها شوي اكل وحليب ومموية وغلقته وماشبعت قامت تقولي مياو مياو وماعطيتها لانو ماعندي الا اللي اعطيتها هو وبعدها قعدت تتمسح في رجلي وبرضو طلعت صوت خفيف غريب كأنها شخير بس هذي المرة مرة طولت وهي تمسح في واخرتها بغت تخربشني مو خربشتني لا بس نغزت ( غرزت ) مخلبها في رجلي ولله الحمد اني كنت لابسة بنطلون فبس حسيت بطرف المخلب وجع خفيف
هادا اولا
وثانيا
انا جيت ابغى امسحها بيدي قامت مرة رفعت راسها فخفت انا وبعدت يدي فجيت انا ابغى امسحها مرة تانية ونفس الطريقة واما في المرة الثالثة لما جيت القرب يدي بغت تخربشني مرة رفعت يدها (وقفزت على خفيف ) تبى تمسك يدي وتخربشها بس الحمد لله في اخر لحظة انا شلت يدي والله لو ماشلتها كان يدي صار فيها نزيف
مع اني كم مرة مسحتها ماقد سوت لي شي بس ترفع راسها شوي

واما المرة التالتة جيت ابغى اشيل الصحن اللي كان فيه اكل خلاص هي غلقته ماتخليني اشيله ولما جيت ابغى اشيله بالمرة قامت برضو كمان تبغى تخربشني
وهذا كله امس
وانا ماقد اذيتها وسويت لها شي بالعكس احط لها اكل وحليب وموية مع العلم انها بسة شارع بس هي كبيرة ومدبدبة وربما انها حامل لكن لااعتقد

وفيه حركتين غالبا تسويها بعد ما تنتهي من كل شي ( اكل-تمسح فيني-كل شي ) وهي الاولى بس كل شوي تخرج مخالبها وتدخلها ورى بعضه كل شوي مرة تخرجةلاخر شي وترجع تدخلهورى بعضه مرة تخوف الحركة ذي الحركة تسويها وهي مسدوحة
والتانية تضغط على الارض مادري كيف تضغط مرة يدها اليمين ومرة يدها اليسار برضو كل شوي وكمان تخرج اضافيرها وهي تضغط وبرضو تخوف دي الحركة اما ذي الحركة تسويها وهي جالسة او قايمة

ونفسي اعرف ليش هاديك الاشياء اللي سوتها سوتها في :64: :angry: مرة انزعجت منها
وابغى اعرف الحركتين ليش تسويها كانها تستعد لخربشتي والهجوم علي :(
اتمنى انكم فهمتوا على كلامي لانو مو مرتب ومابعرف اوصف كمان ومشكورين

رد: تصرفات بسة شوارع معي فكيف انا اتصرف معها
 

ايوه صح هي شكله شريرة لانو في بسة صغيـــيــرة مـــرررة امكن عمرها شهر واسبوع او اكتر بشوي جات تبغى تمسك ديلها ماخلتها وهجمت عليها وطلعت اصوات غريبة

رد: تصرفات بسة شوارع معي فكيف انا اتصرف معها
 

الله يعينك لكن اظنها تمزح لكن الله اعلم انا كان عندي بسة شوارع وكنت اكلا و اشربها


لكن في يوم ما لقيتها مع العلم انو اولاد الحي كانو دايم يضربونها و في يوم لقيتها مضروبا في حلقها و قعدت امسح عليه و جبت لها معقم و هي تراها كبيرة جدا ولدت مرتين

وعادي ما كانت تسوي حاجة لكن في يوم ما لقيتها فكرت قلت اكيد اولاد الحي قتلوها حزنت جدا جدا

بس الكلام دا من زمان يمكن من سنتين


اسف على اني طولت شكلي حكيت قصة حياتي خخخ

ارجو من الخبراء ان يفيدوك و يشرفني اني اكون اول من يرد على الموضوع

رد: تصرفات بسة شوارع معي فكيف انا اتصرف معها
 

ويشرفني انك اول من رد
والله مادري بس صح هي تاكل وتقعد شوي وبعدها تخرج
امكن احد سوالها شي
بس ايش ذنبي
واذا كانت تمزح الله يهديها مزحها قوي ويخوف ومؤذي نوعا ما
وهو في كل حي الناس المزعجين والمؤذيين انا مرة بعيني شوفتهم يحدفوها بالحجارة
الله اعلم
مشكور على مرورك والرد

رد: تصرفات بسة شوارع معي فكيف انا اتصرف معها
 

حتى دوبي حطيت اكل ( والصحن ماشاء الله مليان لاول مرة ) وكان فيه البسة الكبيرة المتوحشة والبسة الصغيييرة مرة ولمن حطيت الاكل جاؤو الاثنين ياكلوا اما الكبيرة المتوحشة كل شوي تهجم على الصغيرة وتخربشها وتعضها وماتخليها تاكل
معقوله كدة ؟؟!!!!!!!!؟؟؟؟؟؟؟؟؟؟!!!!!!!!!!!؟؟؟!!!!!!!!!؟؟!؟؟!؟
والصغيرة مسكينه ماتقدر تسوي شي وحتى انا ماقدر اسوي شي اذا من غير شي هي تخربشني :(( :(

رد: تصرفات بسة شوارع معي فكيف انا اتصرف معها
 

جزاكي الله أختي على إحسانك لهالقطة
ويارت كل الناس زيك

البسة مسكينة وعلى نياتها ويمكن هي حامل من جد

كونها حامل حتحتاج أكل ويمكن عشان كده تضارب البسة الصغيرة
ولمن تتمسح فيكي الصوت الي تطلعه دليل عالحب والراحة
ولمن ترفع راسها أنا كمان بستي تعمل كده
ويمكن خربشتها لعب
أعرف كثير ناس عندهم بسس يلعبوا كده
أتمنى أكون أفدتك بما عندي
ولو عندك حوش تقدري تحطيها فيه أو مكان فاضي مقفل عشان ماحد يئذيها وتولد فيه إذا كانت حامل

رد: تصرفات بسة شوارع معي فكيف انا اتصرف معها
 

مشكورة على ردك
هو عندنا حوش بس احسه غير مناسب لولادتها لانو كله مكشوف ودايما بابا واخوي يدخلو سياراتهم فيه
لدرجة انو مرة بابا جا يبغى يخرج سيارته قام مو بالعنيه دعس بسة صغيرة وماتت في وقتها وجات امها تدور عليها وما لقتها مايحتج اكمل بس اني اتذكر داك اليوم مااقدر انساه وجلس بابا يقولي انو مو بالعنية وماشافها بس اللي راح راح تقريبا قبل سنه الكلام دا
طولت مرة صح
المهم انا عارفه انو على نياتها بس مرة زودتها انا اخاف من خربشتها حتى صرت اخاف احط لها اكل اخاف وانا باحط تخربشني
ونفسي تكون حامل عشان اشوف اطفالها بس بصراحة كم مرة قلت لاهلي ابغى اجيب لها بيت واخليه لها في الحوش دايما تكون عندنا يقولوا لا ومادري ايش وكمان اذا حطيت لها بيت كل البساس راح تضارب عليه للانو حوشنا فيه مكان اي بسة تقدر تدخل منو
والمزح حقها اذا كان مزح انا اخاف منو في طريقة اقدر اخليها ماتمزح معاي بالخربشة
بس امس مو اول مرة بغت تخربشني في مرة قبل بس مو لهذي الدرجة
مشكورة لمرورك والرد

رد: تصرفات بسة شوارع معي فكيف انا اتصرف معها
 

شوفي هالطريقة يستخدموها مع بسس البيوت
يجيبو معاهم بخاخ موية وإذا خربشوهم يبخوهم بيه

رد: تصرفات بسة شوارع معي فكيف انا اتصرف معها
 

انا بجاوبك بالنسبه للحركه الثانيه تضغط على الارض مادري كيف تضغط مرة يدها اليمين ومرة يدها اليسار برضو كل شوي وكمان تخرج اضافيرها وهي تضغط وبرضو تخوف دي الحركة اما ذي الحركة تسويها وهي جالسة او قايمة

انا قطتي تسوي كذا قبل تنام ويسمونه المساج..

وهذا المقطع شوفيه

http://www.youtube.com/watch?v=HgcGu1R2M-s

وتطلع صوت زي الخرخره وكانه جهاز بوسط صدرها خخخ


وهو طبيعي لنه تألفك وحاسه معك بالامان

والخربشه اعتقد عشانها حامل ماتبيك تلمسي بطنها <<يمكن

رد: تصرفات بسة شوارع معي فكيف انا اتصرف معها