منتديات تو زوو - طلباتكم اوامر -تعليم الببغاء التخاطب

منتديات تو زوو (http://www.2zoo.com/vb/index.php)

- قسم هواة الببغاوات (http://www.2zoo.com/vb/forumdisplay.php?f=31)

- - طلباتكم اوامر -تعليم الببغاء التخاطب (http://www.2zoo.com/vb/showthread.php?t=83179)

طلباتكم اوامر -تعليم الببغاء التخاطب

السلام عليكم و الرحمه.. هذا ردي على بعض المواضيع المقترحه في موضوعي
طلباتكم اوامر..

الي يحب يضيف طلب او سؤال يحطه في الموضوع الي ع الرابط التالي:

http://2zoo.com/vb/showthread.php?t=79026

نبدأ باول موضوع قريت مقال عنه: واللي هوه تعليم الكلام بشكل عام

http://www.petalia.com.au/templates/...m?Story_No=248

في هالرابط بتكلمون عن كذا موضوع.. اول شي يتحدث الكاتب عن تعليم الببغاء الكلام.. طبعن الكاتب تحدث عن سهولة انه الواحد يدرب فرخ على الكلام بما انه صغير و يتعود على الناس بسرعه.. بس اكّد على موضوع الصبر.. و اقترح طريقه الكل طبعن يعرفها الحين اللي هيه انكم تيلسون مع الببغاء فترة ربع ساعه مرتين في اليوم و تختارون جمله او مقوله تتألف من مقطيعن.. مثل صباح الخير او مساء الخير و ما إلى ذلك.

اول مراحل الكلام بتكون عباره عن اصوات غير مفهومه و لكن بتتطور لاحقا خلال اسابيع لكلمات واضحه.. و ركّز الكاتب على انكم تسترون في المرحله الاولى من تعليم الكلام على كلمه او مقطع واحد.. لانه لو دخلتو اكثر من كلمه في الوقت الي الببغاء توه بادي يتعلم فيه بيصعب عليه الموضوع و بيتلخبط... بس من بعد ما ينطق اول كلماته بيكون تعلم الباقي اسرع ^_^

بالنسبه للتصفير.. يعطينا الكاتب ملاحظه و اللي هيه انه الببغاء لو تعلم التصفير بيكون سهل عليه.. و بيتعلمه بسرعه.. بس المشكله انه بيتسهل التصفير و كل ما يجوفك بيصفر و بيستصعب الكلام..
و اخر شي يقترح الكاتب موضوع السي دي اللي يكون عليه تسجيل متكرر.. بس من قرائتيه انا كاسكوكيه اكثر من مدرب للببغاوات قالو انه السي دي يعلم الببغاء التكرار اكثر من انه يعلمه التخاطب.. او الرد بحسب الشي اللي انته تباه له
^_^

تعليم الببغاء باسلوبين التخاطب و التكرار:
http://www.petparrots101.com/speech.asp

يبدأ الكاتب مقاله بتنبيه مهم لجميع مقتني الببغاوات.. اول شي يقول لكم لو انتو في خاطركم ببغاء يسولف سوالف شرات الانسان.. انسو الموضوع.. لانه الببغاء طائر يقلد اكثر منه يتكلم و يخاطب الشخص.. فلو انته حاط في بالك انك تاخض ببغاء و تعلمه يسولف من نفسه فعين من الله خير و غير رايك لانه الموضوع بينتهي بانك انته تنحبط و لا الطير ينباع او يتأثر نفسيا ^_^
يقسم الكاتب الببغاوات المتكلمه في 3 مجموعات

• طيور عاشت مع الانسان و اخذت منه اللغه
• طيور عاشت مع طيور ثانيه متحدثه و تعلمت منها
• ان يكون من الانواع التاليه المعروفه بذكائها و قدرتها ع تقليد الكلام و اللي هيه الافريقي الرمادي و انواع مختلفه من الامازون وما ذكر غيرهن ^_^

و علق بانه هناك اكثر من نوع لتدريب الكلام.. الاول عباره عن التدريب التكراري و اللي فيه يقول راعي الببغاء كلمه و الببغاء يكررها

و النوع الثاني من التدريب هوه التدريب التخاطبي و اللي فيه يقول راعي الببغاء شي و يرد عليه الببغاء بجواب يتماشى مع اللي قاله راعيه.
الطريقه التخاطبيه احلا و كشخه بالنسبه لراعي الببغاء.. بس صعبه وايد في التعليم

اولن بنبدأ بالطريقه الاولي و بعض النقاط اللي ظمنها الكاتب عشان تعلم الببغاء على الكلام التكراري..:1.

عشان تعلم ببغائك الكلام لازم تبدأ بتكرار بعض الكلمات باستمرار
2. اختر كلمه مكونه من مقطعين صوتيين و كررها لببغاءك مثال هلا.. سلام.. هاي ماما بابا تعال يعني من هالكلام السهل الخفيف
3. ابدأ بكلمات بسيطه مثلا للتحيه هلا لانه مب معقوله من اولها بيتعلم يقول السلام عليكم و رحمة الله و بركاته صح ولا لا؟ فابدو بكلمات بسيطه بعدها تطوروا للمستوى الثاني
4. كرر الكلمه بوضوح و خارج نطاق نص معين و كررها حتى تلاحظ انه الطير بدا يطلع صوت و كافأه عليها
5. كافئ الطير بمجرد انه سوى صوت مب لازم يكون حتى الصوت مقارب للكلمه المهم طلع صوت بيربط الطير انه سوى صوت بالمكافأه و من بعدها بيتعلم كيف انك انته تريده يتكلم
6. تعلم كلمه واحده ممكن ياخذ منك جلستين مع بعض الطيور ولكن قد ياخذ شهور مع طيور اخرى
7. طبعن من يتعلم الطير كلمه وحده تقدر تبدا تعلمه كلمه غيرها بس تذكر انك دايمن تراجع له مخزون الكلمات اللي عنده
8. لا تتجه لتعليم كلمات كبيره او طويله مره وحده.. اول شي علمه الكثير من الكلمات السهله و من بعدها انتقل للكلمات الكبيره و تعليقي انا كاسكوكيه ع الموضوع بقول لكم شي مثل علم طيرك اول شي يقول تعال.. و كلمه اسم شخص.. بعدين تقدر تربط هالكلمتين بانك تعطيه امر.. تعال عند فلان او فلانه.. ^_^ او مثلا ماي.. اشرب.. تقدر تسأل تريد تشرب ماي؟ او انك تقول انك انته تريد تشرب ماي... وشوي شوي الطير بيتعلم انه يربط كلمة الماي بالشرب او اسم شخص و فعل تعال

الطريقه الثانيه تعليم الطير التخاطب:
1. اول شي علم الطير الاجابه المستحبه
2. بعد ما يتعلم الاجابه و يعرف كيف يقولها تقدر تربطها او تعلمه السؤال
3. كل مره تسأل السؤال و يعطيك الاجابه المستحبه كافأه
4. كرر التدريب بنفس السؤال و الاجابه حتى يعرف الطير انه الاثنين مرتبطين ببعض و تابع المكافأه
5. انتبه انه الاسلوب الثاني وايد صعب عشان الطير يتعلمه فلو كان الطير مستصعب يتعلم كلمات صغيره فبيكون من غير المعقول انك تنتظر منه يتعلم الطريقه التخاطبيه

تعليقي انا كاسكوكيه ع الموضوع اعلاه ^_^ من واقع قراءاتي المختلفه في كافة مواضيع تدريب الكاسكو ع الكلام

اول شي.. بعطي مثال على التدريب على التخاطب.. علم الطير يقول اهليين .. يوم يتعلمها.. و يتقنها كل مره تقول انته هلا.. عزز انه يرد عليك بكلمة اهلين.. هات حد من الاهل و حاولوا انكم تقلدون هالمحادثه بينكم و هوه يسمع..
الشخص الاول: هلا فلان
الشخص الثاني: اهلييييييييين

و بالتكرار الطير بيربط الكلمتين ببعض.. بعدها تقدر تزيد الموضوع بانك تعلمه مثلن اسمه و بعدها تقول له من انته؟ بيقول اسمه و بيتعلم انه السؤال هذا مقصود منه السؤال عن اسمه...

سلفرو9 سأل عن هالشي بالتحديد.. انه كيف نعلم الطيريتكلم متى ما نحن نريد.. اول شي لازم تحط في بالك انه الطير ما بيتكلم غير لو هوه مرتاح.. و غير جيه بيستصعب كل الموضوع ^^

فما عليك تسوي غير انك تربط اشياء معينه بببعظها.. مثلا خذ هذا المثال.. علم الطير كلمة هوب.. و كل ما تحط ايدك عنده خله يقول هوب.. اربط حركة ايدك بكلمة هوب.. ساعتها كل مايريد يركب على ايدك بيقول هوب.. ^_^

غير جيه.. علمه صوت الحيوان و اسمه.. مع مرور الوقت تقدر تقول له.. وين القطوه؟ بيقول لك مياو او مثلن شو تقول القطوه؟ بيقول لك مياو.. الموضوع ما يحتاج غير انك تربط الاشياء ببعضها باسلوب مبسط وايد للطير..

بعطيك مثال فيديو تقدر تستفيد منه و تاخذ فكره عن الشي اللي انا اقصده
http://www.youtube.com/watch?v=lSDFzg8_Wfg
^_^
في هالفيديو اينشتاين معلمتنه راعيته كل ما قالت شي يرد عليها بجواب.. او صوت .. بس ما يكرر اللي تقوله.. ولو بتلاحظ متعلم كم حركه.. اللي هيه اونه يسوي عمره يعدل صوته عشان يكمل الكلام.. و هيه تعلق على هالشي.. فهاي طريقه انك تعلم ببغائك انه يرد عليك بدال ما بس يكرر الكلام^_^
طبعن اساس التدريب الناجح بيكون التخطيط.. انته شو ناوي تسوي لببغاتك؟ و اهم شي في التدريب الصبر و اتمنى تكون هالدوره المختصره في التدريب ع الكلام تكون مفيده ^_^

و السموحه منكم 