|
جم سؤال بخصوص الاصله البورميه
السلام عليكم
اول شي انا مبتدء و انتمنا ماتقصرون معاي بالجواب الوافي مع اني باذيكم بالاسئله هههههه شباب قبل يومين شريت اصله بورميه البينو طولها 80 سم تقريبا واليوم شريت بعد وحده بس مو البينو.. عاديه طولها 75 سم تقريبا اول سؤال :- لاحضت ان رقبه الالبينو اضعف من رقبه العاديه... هل هذا شي طبيعي ولا قاصين علي واهي مو اصله بورميه ؟ ثاني سؤال والاهم شلون اعرف اذا نثاي الي عندي ولا ذكور ؟ و هل الذكر مايكبر نفس النثيه ؟ السؤال الثالث :- العاديه لاحظت ان عليها حشرات صغيره كلش ماتبين هل يضرونها ؟ للعلم غسلتها بماي مو بارد ولا حار ومشيتها بكلنكس (منديل) واذا ماخاب ضني راحو كلهم السؤال الرابع :- شنو يصير للالبينو اذا عرضتها للشمس ؟؟؟ تموت مثلا ؟؟ السؤال الخامس:- شكثر يبيلهم وقت على مايكبرون ؟ مثلا يصيرون متر ونص ولا مترين هل تكبر بسرعه ؟؟؟؟ للعلم انا حاط كل وحده بحوض كبير بروحها |
رد: جم سؤال بخصوص الاصله البورميه
انا مبتدئه ما اقدر اقول لك الا عن الحشرات
انا كل يوم اسبحها بماء دافي من شفت الحشرات لمدة اسبوع و ما راحت و غرقتها و كانت بتموت بس علشان اتخلص من هالحشرات و الحمد لله تخلصت منهم يعني ما يروحون من اول مره و ما زلت اسبحها كل يوم و احطها بالسطح بس نصيحه لا تحاول تغرقها الطول والله ما ادري بس احسها تطول بسرعه اول ما جبتها قد يدي من بدلت جلدها و احسها قاعده تكبر الله اعلم انا بعد انطر الاجابه |
رد: جم سؤال بخصوص الاصله البورميه
أنا الي عندي الحشرات كانو بره الجلد مايدخلون تحت الحراشف و اتوقع أني قضيت عليهم و ماكانو وايد تقريبا من ١٠ الى ١٥ وحده
بس بسوي نفس طريقتج احتياط بسبحها كل يوم بس ماتغرق الي عندي تعرف تسبح لوووول شلون غرقت ؟ فيديني عشان ما اغلط غلطتج لان أنا ببالي ان كل الثعابين تعرف تسبح ؟!؟!؟!؟ |
رد: جم سؤال بخصوص الاصله البورميه
^
لا اهي حطته بالماي و صكت من فوق و نزلته لي تحت و الظاهر تنفس الماي :D عموماً اذا اضعف ما فهمت عليك حط صوره و نقولك نوعها ^^ صعب انك تعرف النثيه من الذكر و يحتاجلها واحد خبير بهالسوالف لكن بعطيك الطريقه و ما أدري إذا بتضبطها ولا لا امسكها من و شوف تحت اخر شي عند ذيلها الفتحه ، خل راسها عاليسار و الذيل يمين بإيدك إضغط من اليمين لليسار بعدين نزل الذيل و اضغط بإبهامك الي عاليسار و دزه لليمين إن طلع شي مثل عودين مادري شلون صايرين هاذا ذكر [ مو الي بره كأنهم أظافر لا في من داخل ] و ان ما طلع شي بس وردي يعني نثيه ,, و النثيه تكبر أكبر من الذكر اي يضرونها بس مو بشكل كبير هذول بتغذون على دمها ، عموماً تراهم ينخشون تحت الحراشف و مرات ما يبينون فجيك عدل عليها ,, لا بالعكس إذا ما عندك لمبه UV ، لازم تعرضها للشمس كل يومين ولا ثلاث بس مو شمس الظهر لا خلها عالعصر بالنسبه للنمو ، لو كل شي ممتاز ممكن بالسنه الأولى من عمرها إن توصل لـ 12 قدم = 3 امتار و نص !! بس مثل ما قلت هذا لو مهتم عدل بالأكل الحراره و حجم الحوض و التشميس و غيرها من الأشياء ناس تتم سنيييين و تشوفها توها مترين لكن بالأول و الأخير يعتمد على الحيه الي عندك بعضهم نموهم سريع و بعضهم لا ~ و اي سؤال حاضرين |
رد: جم سؤال بخصوص الاصله البورميه
افاد الاخوان
وانا افضل تحطهم معا بعض في حوض واحد |
رد: جم سؤال بخصوص الاصله البورميه
اخوي بايثون كفيت و وفيت حبيبي ماقصرت
هونت مابي اعرف اذا نثيه ولا ذكر ههههه وبالنسبه للصور والله ودي بس ماعرف بحاول اجرب انزل صورهم اليوم واذا ماعرفت اقدر ادزلك الصور عن طريق الايميل ؟ بس في شغله أنا سامع ان الالبينو أشعه الشمس مضره لها أنت قصدك الثانيه ولا الالبينو ؟؟؟ بالنسبه لاخوي مستر كروكودايل ليش يفضل أني احطهم مع بعض |
رد: جم سؤال بخصوص الاصله البورميه
تعرف تسبح
بس انا اخذت امنخل او المشخال و حطت ماء كثير لان الحشرات كانت على عيونها و مو راضيه تدخل راسها بالماء ونزلتها بقاع الطشت قامت تتحرك كثير كانها بتطلع روحها و خليتها لما شفتها فتحت فمها خفت عليها و شلت المنخل الا هي متحنطه و فاتحه فمها قمت احركها و هي بالماء و اطلعها و ارجعها لين فجئه رجعت روحها قامت طلعت مو عارفه طريقها و فمها مفتوح كانها تبي تطير و بعدها طلعت الماء الي بلعته ثاني يوم بدلت جلدها و هذا الي خلا الحشرات الي بقت في عينها تروح و الحمد لله الحين هي بخير وما في شيء عليها كل امورها طيبه بس تخاف من الماء علشان كذا لا تغرقها ^_^ |
رد: جم سؤال بخصوص الاصله البورميه
لا عادي ما يصير فيها شي
اصلاً مهمه الشمس لها ^^ . . |
رد: جم سؤال بخصوص الاصله البورميه
بايثن جربت االطريقه الي قلت عنها علشان اشوفها ذكر ولا انثى بس صوت بطنها كلش ما يساعد احس في شيء يتكسر في بطنها
ولا طلع شيء متاكد ما منها مضره هالطريقه ؟؟؟؟ |
رد: جم سؤال بخصوص الاصله البورميه
اذا سويتيها بالشكل الصحيح لا ما يضر
عموماً الطريقه صعبه انا غصب قدرت أعرف نوع البول بايثون و رد تيل صغيره حيل الباقي ما عرفت على فكره أغلب المرات بتقولون نثيه لأنكم ما سويتوها بالشكل الصحيح فلما تجربون على ذكر و نثيه بعدين تتأكدون من شغلكم ما اتوقع بتعرفون من حيه وحده ^^ |
رد: جم سؤال بخصوص الاصله البورميه
سويت سرتش على هالموضوع و اتوقع انها انثى و الله اعلم
لقيت عن البول بايثن هل هو نفس الشيء؟؟ لان ما شفت الي زي الدبابيس الي على الجنبين هذي الانثى http://www.vpi.com/sites/vpi.com/fil...m(VPI)001j.jpg هذا الذكر http://www.vpi.com/sites/vpi.com/fil...e(VPI)001j.jpg |
رد: جم سؤال بخصوص الاصله البورميه
اتوقع اني عرفت شلون انزل الصور... عاد ان شاءالله منزلهم صح صارلي ساعه ونص اعابل
هذي البورميس العاديه http://www.2zoo.org/get-10-2010-2zoo_org_4j0e48el.JPG وهذي المفروض انها البينو مايندرا عنها http://www.2zoo.org/get-10-2010-2zoo_org_n3zozdvh.JPG وصورت روسهم يم بعض لاحضو ان راس الصفره اصغر من راس الزيتيه مع ان الصفره اطول http://www.2zoo.org/get-10-2010-2zoo_org_1pxfmxir.JPG و ابي رايكم بالثنتين الله لايهينكم يا اهل الخبره |
رد: جم سؤال بخصوص الاصله البورميه
لا عادي مافيهم شي و حلوين لايقين على بعض :D
يتربون بعزك :D |
رد: جم سؤال بخصوص الاصله البورميه
تسلم حبيبي بايثون ماقصرت بس الصفره اكيد بورميه صح ؟؟ لاني شاك فيها الصراحه
|
رد: جم سؤال بخصوص الاصله البورميه
اي اكيد هاذي بورميه و عشان تتأكد بعد
سو بحث بالصور بجوجل عن Albino Burmese Python او حط قبلها Baby و بيطلعونلك ^^ و ما يحتاج تتأكد مبين انها بورميس :D |
رد: جم سؤال بخصوص الاصله البورميه
ماقصرت اخوي بالنسبه للزيتيه والحشرات الي عليها مايصير ارش فليت (بيف باف) على جسمها ؟؟؟ لاني سمعت ان الديتول مو زين
|
رد: جم سؤال بخصوص الاصله البورميه
ربي يحفظهم لك و تشوف عيالهم
حبيت الالبينو ودي احصل وحده قد الي عندي حلوين ما شاء الله لا قوه الا بالله انا مو ذاك الزود في الثعابين بس احب اسوي بحث عن كل نوع يعجبني الي عرفته انهم يفرقون كثييييييير عن بعض من ناحية النقشه و الالوان بس كل نوع و الالبينو منه يكون نفس النقشه بس الالوان الاساسيه تقلب لالوان من تدرجات البرتقالي لى الأبيض و الالبينو اذا وصلت للابيض ما اعرف افرق بين البول و البورميز و الريتيكولاتس بايثون اذا كانو صغار فخليها في بالك قاعدة النقش هي الاولى البول بايثن: نقشتها كانها قلوب او صبغ مكبوب البورميز بايثن: زي المستطيلات الريتيكولاتس بايثن: نقشتها انيقه كانها مرسومه بالكمبيوتر نقطه نقطه سبحان الله القاعده الثانيه شكل الوجه والعرض و الطول مع بعض -_- ان شاء الله تكون معلومتي سليمه و بكذا نكون حلينا مشكلة الشك ان شاء الله ^_^ |
رد: جم سؤال بخصوص الاصله البورميه
^
لا أقدر أوريج بول بايثون نفس نقشة البورميس :D الأشكال معروفه و لو انك ما تعرف الأشكال مع الوقت بتحفظ و بالنسبه للبفباف انت بتقضي عليها بعد :D شوف تروح صيدلية أوادم تشتري منهم بيتادين الي اهو غسول للفم و بيبي لايت تحطهم بماي دافي تخلطهم لين الماي يتعكر يعني مو تحط وايد وايد ولا شويه ، بعدها خلها تسبح و صكه من فوق خلها عشر دقايق و لما تخلص سبحها بماي دافي عشان مره ثانيه عشان الحشرات الميته تطيح مره مرتين ثلاث أربع ليييين تخلص ^^ و تذكر ترفع الرطوبه وقت تبديل اليلد :D و اي سؤال حاضرين :D |
رد: جم سؤال بخصوص الاصله البورميه
تسلمين اختي سمكه صغيره الصراحه رد يطيب الخاطر و مامن شك الحين
وتسلمين على كل الكلام الي قلتي ومعلوماتج تجمد عالشارب ههههههههههه ماقصرتي انتي و اخوي بايثون كفيتو و وفيتو الله لايحرمنا من معلوماتكم بس عندي سؤال فضولي اختي البورميس مالتج شكبرها ؟ جم طولها ؟ الصراحه ماشالله عليج صادمتني سالفتج انج بنت وتربين حيه :s |
رد: جم سؤال بخصوص الاصله البورميه
تسلم ياخوي بايثون أنشالله من باجر الصبح بروح اشتريهم و اسوي طريقتك
وجد تعبتك معاي يالحبيب.... بس ااااااخر سؤال وماكو غيره بالنسبه للطريقه الي قتلي عنها عشان اعرف النثيه من الذكر حاولت وشفت مثل شوكتين بس مو طالعين من فتحه الإخراج لا.. وحده يمين و وحده يسار بس مايطلعون لي بره بس اقدر اشوفهم بعيني واهم داخل لونهم بني فاتح تقريبا وارد اشكرك مره ثانيه لأنك أفدتني وايد الله يجزيك الف خير |
رد: جم سؤال بخصوص الاصله البورميه
بول بايثن نفس نقشة البورميس ؟ O_o ما احس تركب بس معلومه حلوه
ان شاء الله اصير افرق بالشكل لان ما افرق بين البايثنز الا البلود بايثن لانها دبه و قصيره تشبه الدوده من متنها ___________________ والله شكلها قد الي عندك تقريبا يوم آخذها يقول لي الي في المحل عمرها3شهور الحين اتوقع 4 اليوم باكلها خامس فار <<<تعد الاسابيع بالفيران |
رد: جم سؤال بخصوص الاصله البورميه
عزيزي بالنسبة للحشرات....حط البايثن في اناء ليوم بس لااا يكون الماء كثير...عشان ماتغرق. الثعابين بطبعها تعرف تسبح واذا اللي عندك بورمية (يفضل انك تنزل صور) فهذه الثعابين تحب تاخذ لها حمام ماء من فترة لاخرى. أنا اللي عندي يحب ينقع نفسه في الماء لأياااام!!
في مواد كيميائية ممكن تشتريها تقتل العث (اللي هي الحشرات اللي على ثعبانك) و غير مضرة للثعبان. و لاااازم تنظف القفص أيضا.. بمواد كيميائية (انا بعض احيان استخدم كلوروكس) و خلي القفص بالمواد الكيميائية لساعات عشان المنظف ياخذ وقته في قتل جمييييع العثه. و بعدين غسله مضبوووط حتى لا يضر ثعبانك لمن ترجعه في القفص..........سوي نفس الشي للثعبانين والقفصين. العثه غثااا عشان تتخلص منها نهائيا. بالنسبه للجنس..ممكن تستخدم قضبان خاصه تنباع. و طريقة استخدامها موجوده في الارشيف واضحة و مسهله.. هذه افضل و اسلم طريقة لك ولثعبان. أبدا لا تعرض البرميز للشمس أو اضاءة UV. الثعبان الامهق ماعنده مايحمية من اشعة الشمس. و بالنسبة للنمو فهذه الثعابين تنمو بسررررعة. لا تحاول تأكله طول الوقت حتى ماتزيد شراهته و نفسيته...لا تعوده على كذه عشان يسهل عليك معاملته (على الامد البعييد لأن ثعبانك راح يكبر و يصير مو من السهل معاملته). أنا اللي عندي اوكله 3-4 فيران حجم كامل كل اسبوعين (طوله اقل من المتر بشوي). طبعا مايحتاج اقلك انه يفضل و يحبذ جدا انك تحط بيت في القفص. الثعابين بطبعها تحس بالامان داخل هذه البيوت لانها ظلمه و صغييره (هي كذه الثعابين تفضل الاماكن الضيقه و المظلمه). هذا يقلل من انه ااثعبان يصير مضطرب و خايف. وأي سؤال احنا حاضرين. بالتوفيق |
رد: جم سؤال بخصوص الاصله البورميه
الله لا يحرمنا من معلوماتك اخوي جد ماقصرت و كنت متوقع ان الالبينو بالذات ماله داعي تتعرض للشمس وماله داعي لمبه اليو في
لك جزيل الشكر والله ماقصرتو شباب و هم ماقصرت اختي سمكه صغيره |
رد: جم سؤال بخصوص الاصله البورميه
لا لازم الشمس !
لكن مثل ما قلت شمس الــعصاري الـخفيفه و هالشي مهم و اعرف نـــاس مربين الــبينو من اكثر من 7 سنين و يشمسونهم و عادي مافيهم الا العافيه ~ لكن مو كل يوم يعني كل اسبوع مره تخليها 10 دقايق كآفي ^^ . . |
رد: جم سؤال بخصوص الاصله البورميه
والله تبون الصراحه تشتت تفكيري لان أنا قريت اكثر من موضوع يقولون في الاصله بشكل عام ماله داعي تشمسها وبالذات الالبينو
بس انت اخوي بايثون اكدتلي هالموضوع واقتنعت فيه و بعدها الاخ سالات اكد الكلام الي أنا قريته :s جان يتوهق لوووول ابي المعلومه الاكيده من شخص مجرب... تتشمس الأصله ولا لا والالبينو بالذات |
رد: جم سؤال بخصوص الاصله البورميه
اقولك هذاك من 7 سنين &&"
بس الحين صار كل اسبوعين او 3 لأن صعب شيلتها من الحوض بروحه فلما يبي ينضف او شي يشمسها مره وحده شايلها شايلها . . لكن حاجة الأصلات عموماً للشمس مو بذاك الزود مثل السحالي لكن التشميس مفيد لصحتها و بعضهم يخقون بدون تشميس ~ |
رد: جم سؤال بخصوص الاصله البورميه
شمسها يا الفجر يا العصر مو بالقوايل
حتى البشر الالبينو (اعداء الشمس) يطلعون بالشمس بس دايم قبل لا يطلعون يدهنون نفسهم بالسن بلوك و كريمات خاصه لهم تحميهم من الاشعه الضاره لجلدهم بس الفجر و العصر لما تخف الشمس يطلعون عادي |
رد: جم سؤال بخصوص الاصله البورميه
اول شي مشكورين عالردود وماقصرتو و ان شاءالله راح اشمسهم بس مو كل يوم
ثاني شي عندي لكم بشااااااااااااااااااااااااااره اكتشفت علاج الحشرات بالصدفه كنت بسافر 3 ايام فقررت اني احطلهم ماي بشي كبير فحطيت داخل الحوض الصحن الي اطرافه مرتفعه اقصر من مال الشوربه قلت عشان مايخلص الماي طبعا الالبينو ماتدخل بالماي بس الثانيه دخلت بالصحن وطلعت راسها بس من الماي الضاهر عاجبها الوضع... المهم الي انصدمت منه ان لقيت الحشارت كلهم ميتين وطايحين داخل الصحن فطرت فيها وقلت الحشرات ممكن يتحملون فتره بسيطه بالماي ( اذا سبحنا الحيه ) بس مستحيل يتحملون 3 ايام بالماي و اهو اساسا مو حشرات ماي فقلت اقولكم شصار معاي يمكن احد يستفيد و انصح اختي سمكه صغيره انج تسوين نفسي منتي خسرانه شي جربي عندي سؤال صغير توه طرا على بالي بالحجم هذا اقدر اعطيهم كتاكيت صغار ؟ |
رد: جم سؤال بخصوص الاصله البورميه
احم احم بدليه : فطرت = فكرت
|
رد: جم سؤال بخصوص الاصله البورميه
المرات الجايه لو بشتري ثانيه و فيها حشرات بسويها
بس الاخ salat07 يقول ياكلهم 3 او 4 فيران كل اسبوعين ما فهمت كيف لان انا ابي اخلي الي عندي تاكل كل 10 ايام لان الآن لها 8 ايام مو لاقيه لها اكل ما في فيران ولا صوص فيه عصافير بس خفت آخذ عصافير و ما تقدر تصيدهم |
رد: جم سؤال بخصوص الاصله البورميه
^
قصي جناحهم :D او من ايدج علطول مسكيه و حطيه عندها و اهي اول ما تعض شيلي ايدج و اهي تلف عادي انا اسويها لوحده من الي عندي لأن اييبلها فيران و اخاف ينحاش ولا شي ألبس دس و من ذيله و احركه جدامها و يروح شهيد :D شوفو اكل الحيايه مو مشكله ممكن تخلونها مده طويله اكثر من 4 اشهر الأكل المثالي للصغار 5 - 7 ايام للكبار 10 - 14 يوم لكن مو شرط جذي يعني انا الملكيه اوكلها كل اسبوعين او ثلاث و البورميه و الشبكيه كل اسبوع البوا فترات مختلفه حاليا كل 5 ايام تقريباً ~ يعني مو مشكله ~ و بالنسبه للي عندك ياكلون كتكوت عادي و انا قلتلك اول حط البيتادين و البيبي لايت مع ماي وخلها داخل &&" جذي تذبح كل الحشرات + حمايه للحيه نفسها :D |
رد: جم سؤال بخصوص الاصله البورميه
تبي الصراحه اخوي بايثون.... خفت احطلها البيتادين مع البيبي لايت تشرب من هالماي وتموت عشان جذي ترددت اني اسويها :S
|
رد: جم سؤال بخصوص الاصله البورميه
لا عادي حتى لو شربت ما يصير شي
انا احطهم و اصك عليهم و أخليهم يلعبون و يمرحون :D |
رد: جم سؤال بخصوص الاصله البورميه
دام جذي يبا شورك وهدايه الله
باجر بسويها و سامحني انا ماذيك بالاساله وايد ماقصرت اخوي |
رد: جم سؤال بخصوص الاصله البورميه
اختي سمكه صغيره.... اطعام الثعابين يختلف حسب حجم الثعبان و حسب حجم الفار او اللي تأكلين ثعبانك.
انا ثعباني طوله تقريبا متر إلا شوي....والبرميز بطبعها مقبره ماترد ميت..الي يحيها تبي تاكله. انا ثعباني يقدر ياكل اكثر من اربع بس انا ماأزيد عن اربع عشان اتلافى انه الثعبان مايرجّع. بعض الثعابين تاكل زياده عن حدها و بعدها بيوم يرجع اللي ماقدر عليه..او كل اللي اكله. و اذا تبين مساعده عن نوع ثعبانك و كم ياكل انا حاضر... و برضو النت مايقصر..تقدرين تلاقين فيه تقريبا كل اللي تبينه. وبالتوفبق |
| جميع الأوقات بتوقيت GMT +3. الساعة الآن 08:11 AM. |
Powered by vBulletin® Version 3.8.8 Alpha 1
Copyright ©2000 - 2025, Jelsoft Enterprises Ltd
الحقوق محفوظة لمنتديات تو زوو