|
تولد عندي او عند الطبيب ؟؟
السلام عليكم ..
انا عندي قطوة حامل وباقي اسبوعين او ثلاثه وبإذن الله تولد بسلامه لكني محتاره بشي ودي انها تولد عندي بالبيت لاني قريت انه القطه اثناء الولادة بالفطره هي تسوي كل شي لأولادها وانا بس اكون حولها عشان لو حصل شي وان شاءالله مايحصل شي وتعدي بسلام خصوصا اني خريجة تمريض يعني وضعي يساعد شوي وعندي رغبة جامحه اني اعيش معها هاللحضات التاريخية بحياتها وحياتي ( اول مره تحمل عندي قطوه) لكن خايفة من اشياء : / 1- لاسمح الله صار لها عسر اثناء الولاده او حصل شي ماشيات واحتاجت نوديها طبيب مايكون عندي احد يوديها طالعين او مشغولين 2- موجود اللي يوديها للطبيب لكن وقت ولادتها مافيه دكتور فاتح صيدليته :( 3- خوفي عليها لانه اول حمل لها وهي صغيره عندها 9 شهور ومن جهه ثانيه انا اول مره تحمل عندي قطوة متحمسه ودي اعيش لحضات الولاده معها ودي اكون انا جنبها .. ماودي تفوتني هاللحضات :shy: عندي القطو الذكر تعب مرتين وانا عالجته بكل المرتين مره كان عنده جرح ملتهب بأنفه ويطلع صديد وصار معاه تعب وضعف عام وطبعا كنت بحاله نفسيه زفت وانتقلت العدوى للانثى الين اخذت لهم مضاد وفيتامين عطيته عن طريق العضل وطابو بعد كم يوم الحمدلله والمره الثانيه جاه نزلة معويه ماياكل ويستفرغ وصار بس ينام حتى مايقدر يقوم يوقف وقريت بالنت عنه ولقيت علاج امبسلين وانتينال وعطيته عن طريق سرنجه وطاب الحمدلله < بعد معاناة مع اعطاءه الدواء عنيد بشكل بس الحمدلله طاب يعني اذا تعبو ماوديهم لطبيب والحمدلله يطيبون عشان كذا ودي تولد عندي عشان اكون معها ومنها اكسب خبره انتم وش رايكم اوديها تولد عند طبيب أو تولد عندي بالبيت |
رد: تولد عندي او عند الطبيب ؟؟
انا اول ولاده جتني رجفه في رجلي مو انا قصدي قطوتي لا تفهمون غلط ههههه
عادي خليه تولد عندك ما فيها شي وانا هذا الاسبوع بتولد قولو مبروك |
رد: تولد عندي او عند الطبيب ؟؟
خايفه يصير لها شي
طيب اسد ممكن تقولي تجربتك وش تسوي عند الولاده وش صار معك ولو تعسرت الولاده وشلون تتصرف .؟ |
رد: تولد عندي او عند الطبيب ؟؟
بالنسبة للآول مرة
طبعا يوم الولادة بتكون قطتك في حالة غير طبيعية مرتبكة وكثيرة القلق حاولي تهديها وتسوي لها جو كويس مافية ازعاج ولا اصوات ولا ناس راقبيها اذا حسيتي انها راح تولد خصوصا لو اتجهت للليتر بوكس لانه شعور غريب (( الطلق )) خصوصاً لأول مرة ممكن القطة تعتبره شعور عادي وكأنها ألم معدة ورايحة تقضي حاجتها وأذا حسيتي أنها مش فاهمة الوضع ممكن وقتها انتي تدخلي وتساعديها ومافي داعي للدكتور نهائياً وألف مبروك مقدماً |
رد: تولد عندي او عند الطبيب ؟؟
اقتباس:
افادك اخوي همستراتي طبعا جاني خوف عليه كثير بس يوم ولدت مره ثانيه صار الامر عادي عندي ان شاء الله ما يصيرله شي وتولد بسلامه الله يوفق معها |
رد: تولد عندي او عند الطبيب ؟؟
والله شوفي اختي اقري عن الولداه للقطط
واذا حسيتي نفسك منك فاهمه روحي عند ادكتور واعطيه رقم البييت عشان لمن توللد يتصل وتشوفي هذه اللحظه التاريخيه (قطتك بتدخل التاريخ هههه) او اذا فااتتك اللحظه او فاتك المنظر شوفي مقاطع باليوتيوب اكيد بتلاقي والسلام عليكم ورحمة الله وبركاته |
رد: تولد عندي او عند الطبيب ؟؟
انا بقول لك تجربتي .. " اشوف انه الأفضل تولد بالبيت لأنها تكون متعوده على المكان و يكفيها قلق و تعب الولاده .. " انتي لازم هاليومين تجهزين كرتونه و تحطين داخلها منشفه أو بطانيه قديمه .. " و تحطين الكرتونه في مكان مناسب بعيد عن الموجودين بالبيت و في نفس الوقت قريب منها و عوديها عليه .. " يعني كل فتره خذيها و حطيها في الكرتونه و اجلسي جنبها و امسحي عليها .. " و مثل ما قال اخوي همستراوي قبل ولادتها بساعات رح تلاحظين عليها القلق و تصير تبيك جنبها .. " يعني في آخر الايام لازم تنتبهين لها و تراقبينها انا صراحه كنت حتى في الليل كل ساعه اقوم اشوفها .. " و لما تبدأ الولاده و يبدأ الطلق خذيها و جلسيها بهدوء في الكرتونه و امسحي عليها و خليك جنبها .. " و لا تخلين احد غيرك يكون موجود لأنها تخاف .. " انا قطوتي اول ولاده لها ما قطعت الحبل السري و لا سوت شي .. " انا اللي قطعته لأنها نظفتهم و نامت من التعب .. " بس ثاني ولاده هي سوت كل شي و كانت ولادتها الثانيه اصعب من الأولى بكثير .. " عشان كذا جهزي مقص صغير و عقميه .. " و كم قطعة قماش يمكن تحتاجينها و قفازات .. " و بعد الولاده حطي لها اكل و مويه قريب منها عشان لا تضطر تجلس عند اطفالها و تحرم نفسها من الأكل .. و نفس الشي الليتر بوكس .. " أنا جهزت لها خيمة أطفال و فرشتها بـ بطانيه .. " و بعد الولاده حطيتها فيها و بمكان معزول عن اللي في البيت لين بعد اسبوع و حطيتها بغرفتي .. " و بخصوص الترويش تقدرين تروشينها ثاني يوم عادي .. " هذي تجربتي المتواضعه أتمنى أكون افدتك .. " و صراحه كانت أروع تجربه أخوضها في حياتي .. " إحساس غريب لا يوصف .. " صحيح اني في كل المرتين كنت أصيح و أسوي مناحه من خوفي عليها .. " لكن بعدها انبسط لأني كنت جنبها و شفت أطفالها و هم ينولدون قدامي .. " أخيرا لو عندك أي سؤال لا تترددين .. " ربي يقومها بالسلامه و تجيب لك أحلى كيتين .. " و لا تنسين تطمنينا عليها .. " |
رد: تولد عندي او عند الطبيب ؟؟
همستراوي ./
الله يعطيك العافيه على النصايح السريعه .. واللي نبهتني عليه انها ممكن تعتبره مغص عادي وتروح الليتر بوكس!! اسد ./ مشكور خيو والله يخلي لك قطواتك ماستر 2010 ./ اكيد لما اشوف مقطع يوتيوب مو زي اني اشوف قطوتي حبيبتي وهي تولد عندي .. وفكرة انه احطها عند دكتور واخليه يدق علي ساعة الولاده واروح اشوفها فكرت فيها لكن من ناحية نفسيتها افضل لها تكون بالبيت والله يعطيك العافيه كيتي ./ الف الف شكر ياعسى ربي يعطيك عل قد نيتك ويوفقك وينولك الي تمنين وصالح لك .. ماقصرتي ربي يحفضك نقلتي لي الي صار معك وبالتفصيل الممل .. اشكركم جميعاَ |
رد: تولد عندي او عند الطبيب ؟؟
مشكور اخوي كيتي
|
رد: تولد عندي او عند الطبيب ؟؟
احب اقولكم اني بعد استشارتكم ونصايحكم توكلت على الله وبخليها تولد عندي لاني جدا متحمسه لهالموقف
الله يسهل ويقومها بسلامه .. وراح اطمنكم عنها بس تولد .. ( دعواتكم القلبيه) .. |
رد: تولد عندي او عند الطبيب ؟؟
الله يوفقك ويساعد قطوتك تقوم بالسلامه
حتى انا اتمنى ان هاللحضه تجي قطوتي بس ما حصلت انتضرها تطلب التزاوج ادعولها تطلب وشكراا |
رد: تولد عندي او عند الطبيب ؟؟
لازم يصير معك جوال دكتور بيطري
علشان القطوه مره صغيره يمكن لاقدر الله يصير شيى انشاء الله تولد بي السلامه |
رد: تولد عندي او عند الطبيب ؟؟
ثلج مشوي .. الله ينولك الي تتمنى وتحمل قطوتك وتولد بسلامه ..
لوسي .. لاتخوفيني حدي داخله مرحلة اكتئاب خايفه عليها هي مو البيبي احس اني ضلمتها زوجتها بسن صغير بس وش اسوي هي الي طالبه مارتاحت ولا هدى لها بال الين زوجتها حتى انها طالبه الزواج بعمر ست شهور بس ابعدت عنها الذكر قد ما اقدر ولما صار عندها 9 شهور اذتني وصارت تتمرغ كثير حتى اهلي يقولون خليه يجيها الذكر خليه يجيها والذكر حقد علي وصار يرش بكل مكان حتى رش بإيدي اكرمكم الله ياربي , الله يسهل :( |
رد: تولد عندي او عند الطبيب ؟؟
اقتباس:
اختي لا تقولين هالكلام و لا تخافين .. " هذي فطره .. " يعني قطاوة الشوارع مين يمنعهم لا يتزوجون و يحملون بـ سن صغير ؟ .. " و ان شاء الله تقوم بالسلامه .. " هو صحيح الافضل بعد السنه و هذا حرص مننا على قطاوتنا بس دام صارت بالغه يعني خلاص طبيعي انها تتزوج و تحمل .. " و لو عندك رقم طبيب بيطري يكون افضل يعني احتياط لا اكثر و لا أقل .. " و بعد عندك تو زوو أي شي يصير معك و تبين تسألين بنكون موجودين بإذن الله .. " :) |
| جميع الأوقات بتوقيت GMT +3. الساعة الآن 01:13 AM. |
Powered by vBulletin® Version 3.8.8 Alpha 1
Copyright ©2000 - 2025, Jelsoft Enterprises Ltd
الحقوق محفوظة لمنتديات تو زوو